Header Ads

  • Baru Nyadi

    Saup mih raban ketuai ngerembaika visyen perintah

    BERANDAU DULU: Dr Rayong (dua kanan) bisi ngatur randau enggau raban ketuai raban bansa sebedau Pengawa Makai Selamat diatur penghulu enggau kapitan baru ba Opis Servis UPP, Pasar Engkilili, kemari.
    ENGKILILI: Kaban Kunsil Nengeri (ADUN) Engkilili Dr Johnical Rayong Ngipa meransang bala ketuai raban bansa ngambika terus ransing agi bejalaika misyen enggau visyen perintah Barisan Nasional (BN).

    Ngasaika sukung nya chukup beguna, iya ngemeratka pekara ke pemaik semua entara ketuai enggau nembiak redak ke dipegai diri.

    “Laban ke nyadi ketuai ba renggat baruh kita kebendar ngembuan tanggungpengawa ke besai dalam ngerembaika genap visyen perintah ngambika juluk nya datai ba raban ke diselinting,” ku iya.

    Iya madah munyi nya rambau bejadika Pengawa Makai Selamat diatur penghulu enggau Kapitan China ke baru dipadu ba Opis Servis UPP N.33 Engkilili, pasar Engkilili ditu kemari.

    Entara ketuai raban bansa tu iya nya Penghulu Nyambong Maweng, Penghulu Lee Chee Ming @ Ah Beng, Kapitan Lai Jiew San sereta Kapitan Boon Bong Fong.

    Berindik ari nya, Ketuai Nembiak Parti Rakyat Bersatu ( UPP) nya mega minta ketuai renggat baruh mantu pengari rayat enggau perintah berunding jalai dikena ngangkatka agi tikas pengidup rayat di menua pesisir.

    “Diatu tikas pengidup komuniti kitai agi jauh tinggal lalu nya berindik ari penatai pemisi ke nadai tentu lalu aku merambu ngasuh kita ngenataika juluk perintah ti keran meda rayat ngembuan penatai pemisi ke besai nengah pengawa ngemansangka tanah.

    “Kitai tu kaya tanah tang nama kebuah pendiau pengidup kitai nadai berubah? Tu laban kitai puntan ngerebut peluang ngemansangka tanah ti chukup besai nya,” ku iya.

    Nerang silik, iya deka ketuai renggat baruh nyengkaum penghulu, kaunselor, kapitan enggau tuai rumah nemu enggau nyemetak juluk perintah lalu ukai semina mangku pengawa tang nadai pengeransing ngereja pengawa.

    “Iya ke rugi iya nya nembiak redak ke nitihka kita lali kitai nangi raban tu deka ngutuk perintah lebih agi pengari rayat,” ku iya lalu minta sebarang pekara ke dibantai bekaul enggau pengelantang sereta penanggul rayat dikenatai nengah jalai ke betul.

    Sama bisi datai ba pengawa makai selamat tu iya nya Penghulu Betuk Tubi, Penghulu Gerang Anchih, Chairman Gerempung Tuai-Tuai Rumah Zon Engkilili Tuai Rumah Johnson Damu, bala kaunselor, tuai-tuai rumah sereta komuniti besemak enggau Engkilili. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads