Header Ads

  • Baru Nyadi

    SDGA, Opis Pelajar udah ngatur Program ‘Nyulut SPM’ di SMK Melugu

    TERIMA KASIH: Langgie (kiba) nyuaka tepa ngagai Jimali (tengah) seraya dikemata pengatur program Nelson (kanan).


    SRI AMAN: Gerempung Graduet Dayak Sarawak (SDGA) begulai enggau Opis Pelajar Sri Aman udah mujur ngatur Program ‘Nyulut Sijil Pelajaran Malaysia’ (SPM) di Sekula Sekondari (SMK) Melugu, ditu bedau lama ke udah.

    Program ti keterubah digaga ba sekula nya udah dipenyadi Ketuai Eksko Pelajar SDGA Jimali Sunang ke ngarika Chaiman SDGA Dr Dusit Jaul. Program ke digaga lima hari berunggu tu iya nya dikena meri peransang sereta nyikap nembiak sekula ti deka napi peresa SPM enda lama agi.

    “Batang tuju program tu iya nya dikena meri peneleba ngagai pesereta program nyaut tanya dalam peresa SPM ngambika sida ulih nyaut nitihka peminta sereta atur peresa.

    “Kelimpah ari nya, kitai mega deka meri peransang ngagai sida ti deka napi peresa ngambika sida teulihka penyulut dalam perea SPM ti deka datai,” ku Jimali dalam jaku pengelalu ya lebuh bejadika Pengerami Nutup Program Nyulut Dalam SPM ti digaga bepalan ba balai sekula nya.

    Rambau program nya, mayuh aktiviti ti udah diatur nyengkaum woksyop subjek SPM sereta licha peransang ke udah disereta 149 iku nembiak SMK Melugu ti deka napi peresa SPM ke deka datai. Entara subjek ke dikemerat rambau program tu iya nya Jaku Melayu, Jaku English, Sejarah, Matematik, Pendidikan Islam sereta Pendidikan Moral.

    Beserimbai enggau tu, Jimali mega ngemeratka tetiap nembiak ngambika nyikap diri ukai semina ari sukut pelajar tauka penemu tang mega ari sukut pengerai diri. Pia mega, iya bisi bekunsika chara ti engkeman dikena nyapai penyulut.

    “Dikena nyikap diri napi peresa tu, kita (nembiak sekula) ukai semina patut nyikap diri enggau penemu ti chukup tang mega meseti nyaga pengerai dikena nentuka nadai meri empas ti enda manah maya kita peresa ke ulih ngujungka pemutus peresa mega enda manah,” ku iya nyemetak.

    Ba kenang ke bukai, prinsipal SMK Melugu Langgie Ujang meri besai terima kasih ngagai Sapit Menteri Dalam Menua II Dato’ Masir Kujat ke udah mantu ari sukut belanja dikena SDGA bejalaika program ti mai empas positif ngagai nembiak sekula kelebih agi di kandang menua pesisir.

    Ku Langgie, nengah pengeransing ngatur program peransang, tu ulih ngempitka seraka pelajar di menua pesisir enggau mengeri.

    Sama bisi datai rambau pengerami tu iya nya Prinsipal SMK Melugu Langgie Ujang, pengatur program Alan Riyat, pengajar kanan, fasilitator sereta ke bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads