Header Ads

  • Baru Nyadi

    Sebuah komiti deka ditumbuh matau projek dibaruh KKLW

    KUCHING: Opis Menteri Pemansang Menua Pesisir enggau Kandang Menua (KKLW) numbuhka sebuah Komiti Begulai enggau Opis Menteri nya, merambu sereta beratika tiap buah projek ke udah sereta deka digaga baruh opis menteri nya.

    Menteri nya Datuk Seri Ismail Sabri Yaakob madah komiti nya dibagi ngagai dua bengkah, iya nya Komiti Kereja sereta Komiti Besai.

    Ku iya, Komiti Kereja nya deka dichairman begulai enggau Kepala Sekretari KKLW, Datuk Borhan Dolah sereta Sekretari Mendam Opis Menteri Betanam Betupi Moden, Tanah Adat enggau Pemansang Menua Pesisir, Buckland Bangik.

    Lalu Komiti Besai deka bechairmanka iya empu enggau Menteri Betanam Betupi Moden, Tanah Adat enggau Pemansang Menua Pesisir, Datuk Amat Douglas Uggah Embas, ke ngarika Sarawak.

    “Maya aum Exco Menua Pesisir Ke-2 ti digaga taun tu, seharitu (MEXCLUB) ari sukut keretas ti dibantaika tadi, kami udah ngaga sebuah komiti begulai kena ngaga perambu sereta beratika tiap buah projek ke benung sereta deka digaga.

    “Komiti ke digaga begulai ngemutarka pekara tu, dibagi ngagai dua bengkah, iya nya Komiti Kereja sereta Komiti Besai,” ku iya madah lebuh bechairmanka aum media Exco Menua Pesisir (MEXCLUB) ditu, kemari.

    Iya madahka, Komiti Kereja deka seruran baum beratika tiap projek nya digaga kena nyeliah penanggul ‘projek sakit’ sereta penanggul bukai.

    Tu berat ku iya, laban tiap projek tumu ditemu enti bisi penanggul.

    Kelimpah ari nya, Komiti Besai deka bejuraika perambu projek baruh KKLW sereta pengawa ke deka digaga di Sarawak.

    “Aum keterubah, Komiti Besai nya di jangka deka digaga pengudah Menteri Besai Datuk Seri Najib Tun Razak mantaika Bajet 2018. Pengudah kami nemu ni naka penyampau ke diungkupka (ke Sarawak) baru kami nemu ari sukut perambu, projek ke deka digaga ulih Perintah Menua,” ku iya.

    Ismail Sabri mega madahka, ke Projek Rumah Rayat ke Meskin Seranta (PPRT) perintah menua deka diberi kuasa netapka rintai sereta endur projek ti deka dikemansangka pengudah iya dikemendar Perintah Besai.

    “Dini endur deka ngaga rumah PPRT baru tauka ngemanahka agi rumah, lis sereta pekara bukai, semua nya deka dikeluar ulih perintah menua. Kami nyerah ngagai Perintah Menua laban Perintah Menua nemu agi endur ke ngipak. “Baka nya mega di Sabah, bisi Komiti renggat menua sereta perintah besai. Reti nya, kami deka meri kuasa ngagai Sarawak ari sukut netapka projek ke deka digaga di menua sida iya empu,” ku iya.

    Bekait enggau aum nya, Ismail Sabri madahka komiti ke sama bisi enggau ngulu aum nya, bejuraika gaya projek baruh KKLW dalam kandang 2017 sereta perambu projek mit ke taun 2018.

    Dalam timpuh nya mega iya madah, enam keretas dibantaika lalu ari penyampau nya, dua iti nya keretas perambu lalu empat iti agi, keretas pemadah.

    “Dua ari keretas pemadah nya, dua ari Sarawak, iya nya bejuraika perambu projek sereta pansik projek baruh KKLW mega nyadi projek (laun) kelebih agi nyambung karan di menua pesisir,” ku iya.

    Sama bisi datai Sapit Kepala Menteri ti mega nyadi Menteri Betanam betupi Moden, Tanah Adat enggau Pemansang Menua Pesisir Datuk Amar Douglas Uggah Embas, Sapit Menteri Pemansang Menua Pesisir enggau Kandang Menua, Datuk Alexander Nanta Linggi enggau Sapit Kepala Sekretari (Dasar) KKLW Norison Ramli. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads