Header Ads

  • Baru Nyadi

    Sebuah Pos Polis Marin patut digaga di Bakun

    NGUJI BOT BARU: Salehuddin (bediri sepiak kiba di belakang) enggau raban iya benung ngujika ‘airboat’ baru.
    SIBU: Sebuah Pos Polis Marin deka digaga ba Tekad Ai Bakun ngambika ulih neritka agi tikas pengelikun ba kandang tekad ai nya.

    Ku Komander Polis Marin Sarawak (Pelilih 5) ACP Salehuddin Mat Zaman, sida udah nganjung keretas kereja konsep ngagai Indu Opis di Bukit Aman ngambika dikemendar.

    “Taja pia udah bisi tim penyaga pengelikun diengkah ba kandang menua nya, baka polis bantu, tang beratika gaya ke diatu, bisi pematut ngengkah raban polis mendam din.

    “Polis nya kami, laban polis marin sebagi ari PDRM (Polis DiRaja Malaysia) lalu pengudah kami bulih pemendar ari (Bukit Aman),kami deka ngengkah raban enggau aset kami di (Tekad Ai) Bakun,” ku iya.

    Iya bejaku munyi nya ba aum media di Markas Taktikal Polis Marin Sibu, Jalai Lanang sebedau berangkat ke Kapit, pagi kemari.

    Ku Salehuddin, pemisi Pos Polis Marin din ila beguna amat nyadi siti ari tagit aset raban penyaga pengelikun menua.

    Lebuh ditanya sentang pemerat ba tekat ai bukai di nengeri tu ku iya, “Tekad Ai bukai mega nyadi tagit ke beguna,keterubah nya tekad ai, kedua pemansut elekterik, palan penyangkai, padang bilun enggau palan endur naruh minyak.

    “Uji perunding, nyema bisi orang nguji deka ngachau tekad ai tu, tentu mayuh kandang menua ke betapi enggau penanggul. Nya alai kami, ngemeratka pekara tu,” ku iya.

    Taja pia ku iya, sida betapi enggau penanggul belanja. Nya alai sia nganjung barang bagi aset ke bisi maya tu.

    Dulu ari nya, penemuai seraya gawa Salehuddin ke Sibu betuju nguji deriba ‘Air Boat PS1-Hovercraft Class’ begulai enggau sekeda pemesai Polis Marin Sibu ke bukai.

    Ku iya, Polis Marin Sarawak udah diberi tanggungpengawa ngujika bot nya,nangkanka nya nganjung ripot nya ngagai Indu Opis di Bukit Aman.

    “Kami deka nguji deriba bot tu nyentuk ke Kapit. Kami deka ngujika pengenan, penyikar, pengulih, pengelaju, penegap enggau penyampau nguna minyak.

    “Pengudah kami nguji, ripot nya deka dianjung ngagai Indu Opis di Bukit Aman sekalika nya manah tauka enda.Enti manah, nitihka ripot kami, Bukit Aman deka meli beberapa buah agi model bot tu,” ku iya seraya madahka rega seunit bot nya RM1.4 juta.

    Salehuddin mega madah, bot nya engkeman ungkup operasyen ngiga sereta nyelamat sereta ari ke diserang, diperambu deka diengkah ba Tekad Ai Bakun pengudah Pos Polis Marin digaga ba kandang menua nya. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads