Header Ads

  • Baru Nyadi

    Sekula tuai ti dikemanah baru deka disikap enggau kereban pelajar ke chukup

    Dato Sri Michael Manyin Jawong
    KUCHING: Opis Menteri Pelajar, Sains enggau Pansik Teknologi beperambu, sekula ke udah tuai ke dilanggur digaga baru deka disikap kereban pelajar ke chukup dikena ngangkatka penyulut sekula.

    Menteri iya, Dato Sri Michael Manyin Jawong madah, kereban nya nyengkaum makmal sains lebih agi ba sekula primari ke diatu ti nadai disikap makmal nya.

    Iya madahka inisiatif nya mega dikena nyaup perintah nengeri ke deka ngangkatka tikas industri ngagai industri 4.0 tauka Revolusi Industri Keempat, kelimpah ari ngambika ulih besemekih.

    “Lebuh kitai ngaga tauka ngemanahka baru sekula ke udah jai tauka tuai di nengeri tu, kereban ke enda tau enda disedia tauka disikap kitai iya nya makmal sains.

    “Diatu semua sekula primari nadai makmal sains tang semina bisi bilik sains. Laban kitai deka ngangkatka penyulut di nengeri tu, kitai enda tau enda ngenukuka makmal sains bisi iya nya makmal sains am.

    “Kitai nuju Industri 4.0 tauka Revolusi Perindustrian Keempat, reti iya beberapa taun ke deka datai ila mayuh pengawa diambi tauka diganti ngena robot, tang mensia ke ngaduka robot nya lalu dikena nguruska nya begunaka penemu enggau pemandai dalam sains enggau matematik,” ku iya.

    Manyin mansutka pekara nya dalam aum pengarang berita Simposium Pelajar Jaku English Sarawak (SELES) 2017 ke diatur ba opis iya di Bangunan Baitulmakmur ditu, kemari.

    Nitihku iya di Sarawak bisi 1,020 buah sekula dianggap udah jai tauka tuai ke diperambu deka digaga baru tauka dikemanahka bererenggat.

    Ku iya, perintah udah ngemendar lalu perintah besai udah setuju kitai melanja RM1 bilion ungkup setaun taun baru dikena ngaga baru enggau ngemanahka sekula jai tauka tuai nya.

    “Ambi nadai kitai berengkah ngaga baru tauka ngemanahka baru sekula jai nya, entara bulan Februari tauka Mac taun baru.

    “Tang sebedau kitai ngereja nya kitai deka ngulaika sekula (mimit nembiak), tang ngempung nya ukai pekara ti mudah laban apai indai enda setuju,” ku iya.

    Lalu 1,020 sekula jai tauka tuai di Sarawak dibagi ngagai tiga kategori iya nya sekula jai kategori tiga bisi 415 buah, sekula jai kategori dua (210) enggau sekula jai kategori satu (395). #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads