Header Ads

  • Baru Nyadi

    SELES 2017 ngangkatka Jaku English di Sarawak

    NGANGKATKA JAKU ENGLISH: Manyin madahka SELES 2017 inisiatif dikena ngiga ‘input’ ngemanah enggau ngangkatka pemanah Jaku English di nengeri tu, seraya disempulang (kiba) Sudarsono enggau Rahayu (kanan).
    KUCHING: Simposium Pelajar Jaku English Sarawak (SELES) 2017 ti keterubah deka diatur kena 23 - 25 Oktober tu, ba sebuah hotel ditu.

    Menteri Pelajar, Sains enggau Pansik Teknologi, Dato Sri Michael Manyin Jawong madah, simposium nya sebengkah ari chara ngiga ‘input’ dikena ngangkatka Jaku English, kelimpah ari ke udah ngatur makmal dalam Jaku English.

    Rambai jaku simposium ti keterubah nya “Connecting The DOts’: Curiculum, Classroom & Community”.

    “SELES keterubah tu nyelai laban beperambu nyadi penyambung kurikulum, chara ti dikemeranka dalam kelas sereta nyentuk ke raban bansa ti di luar institusyen pelajar, ke alai Jaku English ngerembai tang enda ngeruga jaku asal.

    “Objektif simposium tu nyendiaka pelasar endur bekunsi enggau berandauka pasal inovasyen, trens enggau pengirau antarabansa enggau menua sereta pemar enggau chara mutarka pekara ti ditapi dalam bidang pelajar Jaku English.

    “Tuju kitai ngatur tu endang dikena ngemanahka Jaku English di nengeri tu sereta ngiga chara ke engkeman dikena ngangkatka penyulut Jaku English ba sekula ke dikumbai kitai STEM (Sains, Teknologi, Kejuruteraan, Matematik),” ku iya.

    Manyin mansutka pekara nya dalam aum pengarang berita Simposium Pelajar Jaku English Sarawak (SELES) 2017 ke diatur ba opis iya di Bangunan Baitulmakmur ditu, kemari.

    Dipelabaka deka digulu urung 1,200 iku nyengkaum raban pengajar ari semua 31 opis pelajar pelilih menua, UiTM, UNIMAS, Swinburne, Politeknik Kuching, Kolej Matrikulasi Sarawak, IPG Batu Lintang enggau IPG Tun Abdul Razak, ku iya.

    Obejektif bukai simposium diatur iya nya, dikena ngempuru raban akademik, pengemeran enggau beberapa orang ke bisi pemerat baka pekara nya sereta raban bansa.

    “Tu mega nyadika lalau ngagai inisiatif Jaku English renggat perintah nengeri dalam tiga pekara besai iya nya kurikulum, kelas enggau raban bansa.

    “Kitai ti deka ngemeratka Jaku English tu ukai tegal deka ngeruga Bahasa Malaysia tang kitai deka ngemanahka agi Jaku English di Sarawak,” ku iya.

    Dikena nyapai pengawa deka ngemanahka Jaku English ba sekula iya madahka sebedau tu iya udah nganjung surat tesau ngagai semua Kaban Kunsil Nengeri (ADUN) nyengkaum penyakal ngambika ulih ngambu sebuah tauka mayuh sekula endur bejalaika program Jaku English.

    Senentang tu ku iya, kitai enda ngachau jam nembiak belajar dalam kelas, tang kitai minta ngambika bala nembiak, pengajar bsereta apai indai lebuh dalam kadang endur sekula bejaku dalam Jaku English.

    Speaker ke dikanggau ngagai simposium nya nyengkaum ari menua tasik baka Sapit Principal, Singapore Institute of Managemant John Yeo; Senior Fellow UNESCO, Profesor Charles Hopkins; Chief Executive Officer, Tandemic, Kal Joffres engga ke bukai.

    Kelimpah ari nya, Manyin madahka opis menteri iya beperambu deka ngatur seminar ke dibagi ngagai ti zon iya nya Utara, Selatan enggau Tengah.

    “Kami beperambu deka ngatur seminar urung tiga hari dalam tiga zon iya nya Miri, Sibu enggau Kuching , ke alai kitai minta sida madahka pekara tauka pemansang baru ba sekula.

    “KItai mekuh ngagai pengawa nyadi ketuai ba sekula laban sekalika sekula nya nyulut tauka enda, nya bepanggai ngagai ketuai iya nya kepala pengajar lalu udah nya kualiti pengajar,” ku iya.

    Bisi ba aum pengarang berita nya, Sekretari Mendam Opis Menteri Datu Sudarsono Osman; Sapit Sekretari Mendam opis menteri Dr. Abdul Rahman Deen; pengari Direktor Opis Pelajar Nengeri Rahayu Ahmad; Sekretari SELES Hazelynn Rimbar enggau ke bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads