Sitak Telang Usan begunaka mayuh agi raban nyereta RELA - Berita Iban Online | Laman Web Berita Kitai

Header Ads

  • Baru Nyadi

    Sitak Telang Usan begunaka mayuh agi raban nyereta RELA

    KENA ENGGAU TEMEGAH ATI: Dennis Ngau (tengah) nyuaka uniform RELA ngagai Ketuai Kampun Long Pilah Saging Wan seraya dikemata Pemesai RELA Baram, Banguallo Dee Zacros (empat kanan).

    MARUDI: Kaban Kunsil Nengeri (ADUN) Telang Usan, Dennis Ngau minta mayuh agi peranak ari sitak nya ngaul diri sereta nyadi kaban Raban Volunteer (RELA).

    Nyereta RELA tu ukai semina ungkup pengawa volunteer tauka nyaga pengelikun aja, tang nyema ransing bejalaika tanggungpengawa nya ulih mantu sereta meri peluang belajarka pengelandik nyadi ketuai.

    Tu beguna endar nyema deka megai pengawa nyadi ketuai, ketuai raban bansa, gerija tauka komiti ke bukai di rumah panjai, nerenakka disiplin sereta kitai deka gerah jari mantu orang ti begunaka bantu.

    Pekara tu dipansutka Dennis rambau bejadika Kus Pengelala RELA enggau Licha Pengelikun Nagang Penusah Angus diatur di Rumah Panjai Long Pilah di Ulu Baram, apin lama ke udah.

    Bisi 103 iku kaban RELA ari tiga buah rumah panjai di Long Pilah, Daleh Long Pelutan (Long Miri) enggau Sungai Dua udah ngulu program pengelama dua hari semalam.

    Ku Dennis, pemisi platun RELA di rumah panjai, besaup ngereja pengawa begulai enggau Komiti Pemansang enggau Pengelikun Genturung Pendiau (JKKK), komiti gerija sereta mega ngenegapka gawa beraban di genturung pendiau.

    “Nya alai, kitai patut meri terima kasih ngagai Menteri Besai, Dato Seri Najib Tun Razak ti pintar berunding sereta ngatur strategi enggau pengawa ngadaka Opis Volunteer Malaysia di Menteri Pengawa Berumah enggau Opis Perintah ti ngintu pengelantang enggau pekara raban RELA.

    “Tu nyata ngayanka RELA bejalaika pangku pengawa besai endar dalam menua kitai lalu udah diakun nyadi sebagi ari raban ngetanka menua di renggat pun menua.

    “Pengawa numbuhka opis tu mega deka nyaga bala kaban iya di menua tu, ngemai pemaik chukup besai ngagai bala kaban RELA nyengkaum bala platun sereta bala kaban di rumah panjai menua pesisir.

    “Nya alai, lebuh kita ngerasukka uniform, kena enggau temegah ati sereta disiplin laban kita ngarika lebih ari 3 juta kaban RELA di menua tu.”

    Berindik ari pemaik ti diulih ari pengawa numbuhka RELA di rumah panjai, Dennis merambu ngagai ketuai rumah panjai ti apin numbuhka plantun di rumah panjai sida ngambika berunding numbuhka iya enggau jampat.

    Ku Dennis, naka diatu semina urung 30 buah rumah panjai di Telang Usan udah numbuhka plantun RELA.

    “Tagit kami bisi abis nadai siti plantun ba tetiap rumah panjai tauka pengentap pendiau di Telang Usan,” ku Dennis nambah.

    Dennis mega deka meda mayuh ari raban nembiak lelaki enggau indu ngaul diri nyadi kaban RELA. Ari pengawa ngaul diri enggau mayuh macham aktiviti ti diatur RELA, iya pechaya ulih nempa pemanah ulah kelebih agi ba semangat volunteerism, beguna dikena napi ubah pengidup kemaya hari.

    Berebak enggau program nya, Dennis bisi nyuaka uniform RELA baru ngagai bala kaban iya sereta perengka pengerara api ngagai Kampung Long Pilah.

    Dennis mega ngakun semua rumah panjai di sitak iya begunaka penyikap pengerara api kelebih agi perengka pengerara api tang enda ulih nangkup peminta nya.

    Nya alai iya ngansak kompeni peribit tauka raban nembiak, lelaki tauka indu, di rumah panjai bela besaup sereta betulung nyediaka penyikap ti diguna rumah panjai sida.

    “Aram kitai sama ngadaka rumah panjai ti likun ari sebarang penusah,” ku Dennis nyemetak.
    Ku Dennis, iya udah berandau enggau Pemesai RELA Baram ngambika ngatur pekit antara semua rumah panjai enggau plantun RELA dikena meransang sida ngembuan pelin enggau seruran regas gawa sereta tu deka diatur berengkah ari taun 2018 lalu dipelaba deka ditampung ngagai taun ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads