Taman Tunku dituntung penusah bah tunggal - Berita Iban Online | Laman Web Berita Kitai

Header Ads

  • Baru Nyadi

    Taman Tunku dituntung penusah bah tunggal

    Ripin Lamat
    MIRI: Ujan bangat ke berunggu kenyau ari malam Hari Lima ngujungka genturung pendiau di Taman Tunku ensanus dituntung penusah bah tunggal.

    Antara kandang genturung pendiau ti kena pangka iya nya sida ke diau di Jalai Daro, Jalai Durin enggau Jalai Sibu.

    Sekeda sida ke diau dia lebuhka dirandau kemari madahka engka laban penanggul ba parit ngujungka penusah bah tunggal di kandang menua nya enda diputar.

    Siku peranak ti semina deka dikelala ngena nama Debbie, 20 taun, diau di Jalai Daro madah iya enda ulih tinduk enggau meruan semalam nya laban nangika rumah deka ampuh lebuh iya tinduk.

    “Aku bejejaga laban jauh ari apai indai. Aku ukai semina ngibun menyadi biak aku aja tang mega rumah tu nyema tikas peningi ai niki lebuh malam hari.

    “Puji Tuhan, tikas ai semina niki maya siang hari (kemaya) laban ujan kenyau ari malam kemari,” ku iya lebuhka dirandu di rumah sida kemari.

    Ku Debbie, iya udah nyikap diri enggau nusun semua barang ti beguna di rumah nyengkaum barang elekterik ngagai endur ke tinggi.

    “Kebendar iya, kami belajar ari pekara ti kala nyadi rambau bulan Mei tau tu tadi, nyauka semua barang beguna baka barang elekterik enggau karpet rusak kena bah,” ku iya.

    Iya mega udah mindah kerita salun apai indai iya ngagai tanah tinggi tumu dikena nyeliah sebarang pengerusak ngagai kerita.

    Siku peranak ke bukai, Anthony Ng, 45 taun, madahka iya udah mindahka kerita iya ari lot paking iya kenyau ari pukul 6 pagi.

    “Aku irau laban ujan nadai ngetu kenyau ari malam kemari. Lebuh aku dani pagi tu, aku meda tikas ai udah niki, nya alai aku mindahka kerita ngagai rumah bala aku ke diau di tanah tinggi agi,” ku iya.

    Jalai nuju Kampung Lusut di Taman Tunku nengah jematan Sg. Dalam mega ampuh sereta enda ulih ditengah semua entukar.

    Tikas ai di kandang menua dipelaba deka manggai lima kaki penalam.

    Penguna jalai alun ke diau di Kampung Lusut sereta sida ti deka nengah jalai kuntang ngagai Lambir diasuh nikal baru lalu nengah jalai lama Miri-Bintulu.

    Nadai sebarang orang ti tasah bah bisi diripot.

    Genturung pendiau tu udah suah dipangka bah tunggal kandang setaun tu lalu penusah pemadu balat nyadi dalam bulan Mei.

    Berindik ari penusah nya, Kaban Kunsil Nengeri (ADUN) Lambir Ripin Lamat udah ngemendarka agih belanja RM1.5 juta ari perintah dikena mutarka penusah bah tunggal ti mangka sida ke diau di Taman Tunku ditu.

    Iya ngemendarka belanja tu rambau program ‘Mardi Gras Lambir’ di Kampung Tunku Abdul Rahman Lambir kena 13 Mei taun tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads