Header Ads

  • Baru Nyadi

    Tetiap JKKK diperansang ngaga penerang bekaul adat di rumah panjai

    ANANG NGELENGKA KE ADAT: Kaban Serakup Ketuai Komuniti Iban Pelilih Sri Aman benung nyuaka tepa ngagai Masir (dua kiba) seraya dikemata Samuel (kiba) sereta bala bukai.

    SRI AMAN: Sapit Menteri Dalam Menua, Datuk Masir Kujat dekaka Komiti Pemansang Enggau Pengelikun Genturung Pendiau (JKKK) di nengeri tu ngaga penerang pasal adat Iban di rumah panjai ngambika bisi dipeba rebak baru dudi hari.

    “Mayuh rebak baru diatu enda nemu pasal tipan jerita adat asal rumah panjai laban kelalu mayuh penerang pasal adat enggau main asal kemaya hari.

    “JKKK di tetiap rumah panjai patut bejalaika inisiatif kediri empu ngaga penerang semua adat, main asal enggau main Iban di rumah panjai ungkup rebak dudi,” ku iya ngelalau.

    Iya ke mega Kaban Parlimen (MP) Sri Aman mansutka jaku nya rambau bejadika ‘Nostalgia Night’ nyerumba Pengerami Makai Lemai diatur Serakup Ketuai Komuniti Iban Pelilih Sri Aman bepalan di Mini Stadium, Sri Aman semak ditu, malam kemari.

    Ku iya, ambika chunto, adat ngiling tikai tauka bidai, siti ari pengawa dikena nutup Gawai patut ditampung rebak baru. Penyelai adat tu patut ditan ngambika rebak dudi ulih meda.

    Ke diatu ku iya, semina sida ke tuai di rumah panjai aja nemu adat ngiling bidai lalu tebal agi sida ke rebak baru enda entu mereti.

    Nya kebuah, adat ke bansa tu patut ditulis lalu dikeluar dalam bup sereta dibantai ngagai rebak baru kitai ngambika sida ulih nampung enggau belajarka adat kitai di rumah panjai, tandu iya.

    Ukai semina nya aja ku iya, main asal komuniti Iban baka bedungai, beganu, bejawang, mengap enggau besanggai mega majak ditinggal rebak kemaya hari.

    “Main asal tu semina ditemu sida ke tuai lalu iya patut ditampung, abis nadai main asal enggau main benyawa tu dichelak,” ku iya.

    Berebak enggau nya, Masir mega ngelalau rebak baru anang enda ingatka penatai diri ari rumah panjai lalu patut seruran ingatka pekara nya maya sida mindah ke mengeri ngiga kereja jemah.

    “Kita ti nyadi rebak baru patut nyadika rumah panjai nyadi pun bilik taja kita udah bisi rumah kediri empu di mengeri laban rumah panjai tu patut dijaga enggau diintu.

    “Kebuah pia, nyema rumah panjai kitai diintu enggau manah, iya tau nyadi pematak bala temuai ti nemuai di nengeri tu,” ku iya.

    Nya alai ku iya, pemeresi enggau pemanah rampa rumah panjai kitai patut seruran diintu.

    Sama bisi datai Chairman Serakup, Temenggong Samuel Lawen, Pemancha Micheal John Sanggop, Penghulu Briku Busang, Penghulu Joseph Lichong sereta bukai.

    Berebak enggau pengerami nya, Masir bisi nyuaka agih belanja penyampau RM10,000 ungkup serakup nya dikena bejalaika aktiviti ninting taun sida ungkup taun 2018. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads