TGM PBB dipelabaka ditangguh nyema beserak enggau PRU14 - Berita Iban Online | Laman Web Berita Kitai

Header Ads

  • Baru Nyadi

    TGM PBB dipelabaka ditangguh nyema beserak enggau PRU14

    Datuk Amar Douglas Uggah
    KUCHING: Aum Besai Pengari Tiga Taun Sekali (TGM) Parti Pesaka Bumiputera Bersatu (PBB) dipelabaka ditangguh dulu nyema beserak enggau Pengawa Bepilih Besai Ke-14 (PRU 14).

    Pekara nya dipadahka Sapit Kepala Menteri ti mega Pemangku Sapit Presiden PBB, Datuk Amar Douglas Uggah embas lebuh ditanya raban media pasal berita selebubu sekalika gempuru PBB nya diatur sereta enggau PRU 14 ti dipelabaka diatur taun baru.

    “Nyema Aum Besai Pengari Tiga Taun Sekali Parti Pesaka Bumiputera Bersatu (PBB) diatur beserak enggau PRU 14, kami (PBB) engka deka nangguhka gempuru nya.

    “Kepala Menteri iya nya Presiden PBB kami, Datuk Patinggi Abang Johari Tun Openg udah beratika pekara tu enggaika nyadi. Nyema (Gempuru PBB) beserak enggau PRU 14, kami engka deka nangguhka gempuru nya,” ku iya.

    Taja pia ku Uggah, nyema PRU 14 diatur pengudah gempuru, gempuru nya ulih dipajakka, ke alai PBB udah merambu ngatur Gempuru PBB bulan Februari taun baru.

    Uggah madahka pekara nya ngagai media pengudah datai bejadi sereta ngelepaska pejalai program Kembara Batang Lupar Opis Menteri Pemansang Orang indu, Ruang Bilik enggau Raban Bansa (KPWKM) ditu. Sama bisi datai Menteri KPWKM, Dato’ Sri Rohani Abdul Karim.

    Berebak enggau tu, Uggah ke mega Menteri Betanam Betupi Moden, Tanah Adat enggau Pemansang Kandang Menua madah, sebengkah aum begulai enggau kaban komiti besai PBB deka diatur kena 30 Oktober tu.

    Ku iya, aum nya diatur dikena mendingka ripot pasal penyikap komiti ba renggat mit PBB.

    “Kitai udah ngatur aum keterubah beberapa hari ke udah. Ari 30 Oktober tu, sida (komiti mit PBB) dipinta ngaga ripot ngagai komiti besai sereta madahka nama langgur sida sereta anggar belanja enggau program ke udah ditusun tiap komiti PBB,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads