Tiga pampang PRS Pampang Tamin agi keranka Entulu dichalun ba PRU14 - Berita Iban Online | Laman Web Berita Kitai

Header Ads

  • Baru Nyadi

    Tiga pampang PRS Pampang Tamin agi keranka Entulu dichalun ba PRU14

    Datuk Joseph Entulu Belaun
    SIBU: Dunya politik di Selangau deka angat baru lebuh ketetetiga sayap Parti Rakyat Sarawak (PRS) Pampang Tamin nyengkaum Komiti Besai, Indu enggau Nembiak iya sepenemu keranka Kaban Parlimen Selangau Datuk Joseph Entulu Belaun dichalunka baru ba Pengawa Bepilih Besai Ke- 14 (PRU14) tu ila.

    Sapit Chairman PRS Tamin Augustine Amin, Sekretari PRS Tamin John Entebong, Ketuai Indu PRS Tamin Liah Umal enggau Ketuai Nembiak PRS Tamin Hendary Suria Linggang bela sereta mansutka penerang media kemari madah, Parlimen Selangau naka tu bedau begunaka orang baru nukar Entulu ke mega Sapit Presiden PRS.

    “Kami nyemetak nulak sereta enda setuju enggau sebarang orang baru ke dichalun ba Parlimen Selangau ila.

    “Penemu kami nya digaga bepelasarka Aum Besai Ninting Taun (AGM) PRS Pampang Tamin, apin lama ke udah lalu nya endang resolusyen besai digaga kami maya aum nya,” ku terang sida.

    Nitihku sida, semua program enggau pengerami ke diatur Entulu ba sitak Selangau nerima timbal ke chukup manah ari rayat lalu tu mandangka iya meruan bisi sukung ari pengundi ba Selangau.

    Sida madah, penerang ti dipansutka sekeda piak apin lama ke udah pasal bala pengundi biak ti ngasuh Entulu ditukar enggau chalun baru semina peragam tauka penemu kediri ukai ari sukut ke nyengala.

    “Ari mayuh program enggau pengerami ke digulu Entulu di Selangau ngelama tu terang mandangka iya agi nerima sukut penuh ari rayat renggat baruh.

    Penerang ti dipansutka piak nya semina penemu kediri sereta nadai berati sapa Entulu ba ati rayat mayuh,”ku sida.

    Ngelansa pasal Rita Insol ti diperita deka nukar Entulu, sida sepenemu nyakal sereta madah Rita enda ulih nukar penuduk Entulu.

    “Sayap indu PRS Tamin deka madah ditu Rita ti kala ngumbai diri Ketuai Indu PRS Tamin nyadi nya jaku ke bula besai.

    PRS Tamin enda kala nerima nama iya dichalun ba sebarang penuduk ba pampang Tamin, pia mega PRS Pampang Tamin enda kala nerima peminta iya nyadi kaban laban atur minta nyadi kaban meseti nengah pampang parti sebedau dikemendarka indu opis parti,” ku tandu sida.

    Udah nya, bekaul enggau penerang Presiden PRS Tan Sri James Masing ti madah pengawa nganjung nama chalun baru ungkup Kaban Parlimkawasanen patut disukung chara betulis ari Kaban Kunsil Nengeri (ADUN) sitak.

    “Formula munyi tu endang baru lalu enda kala dikena sebedau tu sereta enda kala dikerandau enggau silik ba renggau komiti besai parti tauka indu opis parti.

    “Nyema penemu Masing tu diterima nyadi tu deka numbuhka kes diperesa lalu tentu deka ngenusahka pengawa ba pengawa bepilih besai ila,” ku sida.

    Nitihku ketuai parti pampang nya, kriteria ke dikena enggau chara puntang baka nya ulih ngujungka nyadi isu tiris enggau berat sepiak ke ngujungka ngerusak pengelantang parti sereta Barisan Nasional (BN).

    Ku terang sida, parti PRS Tamin nula sebarang aja chalun ke dipesebut nukar Entulu laban pekara tu dipeda baka ‘kedalih’ deka ngiarka Entulu ari dunya politik enggai nadai nitihka peneka majoriti rayat.

    “Penerang ke dipansut sebedau tu semina diasai penemu sida nya kediri ngumbai penguni biak kerenak orang baru dichalun ba Parlimen Selangau,” ku sida.

    Sida madah, PRS Pampang Tamin agi begunaka servis Entulu laban iya agi bepengerai, regas sereta suah dipebasa enggau dikearapka ketuai renggat tinggi BN lebih agi Menteri Besai Datuk Seri Mohd Najib Tun Razak ukai se,ina ba renggat nasional tang mega dikearap nguluka pengawa ngagai tikas entarabansa.

    “Kami anak Selangau enggai lenyau penuduk enggau pengawa besai nyadi Menteri Kabinet Malaysia ke dipangku Entulu diatu iya nya nyadi Menteri ba Opis Menteri Besai.

    “Kebuah pia laban sebarang aja ke deka nukar penuduk iya, orang nya (chalun baru) sigi enda ulih datai ba penuduk ba enggi iya.

    “Sejarah mayuh udah dipeda mandangka Entulu bisi pengulih nyadi ketuai kami.

    “Nya alai, seagi iya ulih seagi nya mih kami deka iya ditan,” ku tandu sida.

    Nya alai, sida deka Masing bebasaka pilih rayat ari ngaga pemutus kediri ti lebih diasaika penemu kediri sereta deka ngapika rayat di Selangau. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads