Header Ads

  • Baru Nyadi

    UPP Pujut ngelancharka visyen ‘MYY HOPE’

    Bruce Chai
    MIRI: Parti Rakyat Bersatu (UPP) pampang Pujut ngelancharka visyen MYY HOPE (Juluk Menua Miri) ti mansutka penemu enggau timbal ari rayat ke pemaik mengeri besai Miri.

    Chairman iya, Bruce Chai madah, visyen tu mungkur tiga batang pekara besai iya nya ekonomi, sosial politik enggau pemansang dikena ngemansangka selampur menua Miri.

    “Kitai patut bisi pelin besai ke tegap ungkup Miri ngambi enda tinggal ba belakang laban Sarawak nyingkang nuju nengeri maju,” ku terang Bruce.

    Nerang silik, Bruce madah, MYY HOPE deka meda pemansang Miri ba pelasar ke betul berurun enggau pemansang jeman moden ke diatu.

    Tu nyengkaum ngaduka ekonomi, nentuka pemansang infrastruktur ditampung sereta netapka polisi dikena ngetanka penyelai Sarawak.

    “Penemu enggau juluk visyen MYY HOPE ukai dikena ngelaban visyen perintah nengeri tang nempa Miri nyadi mengeri dagang temuai, sereta ulih nyungkak penatai pemisi dalam nyapai visyen nya,” ku iya.

    Penemu MYY HOPE ulih nyadika malin ngagai bala ketuai diatu enggau baru ngatur pelin pemansang ungkup pemansang Miri jemah.

    Enti deka nyapai nengeri Maju, Miri patut nyaup pemansang ba sukut sosial enggau ekonomi kelimpah saup ari perintah nengeri enggau perintah besai.

    Entara juluk peranak Miri iya nya nambahka palan pelajar nyengkaum numbuhka universiti betikas antarabansa kedua, merening ngagai pemansang ICT enggau institusi pelajar industri minyak enggau gis dalam ngiga pengereja pengawa landik ba industri tu.

    “Kitai mega ngarap indu opis Petroleum Sarawak (PETROS) ditumbuh ba Miri laban Miri udah lama nyadi palan pemansut minyak ngagai Petronas, Shell enggau serikat multinasional antarabansa baka minyak enggau gis ke ngelatih mayuh profesional ke guna industri enggau PETROS,” ku Bruce.

    Berebak enggau pengawa ngelancharka MYY HOPE, UPP Pujut deka ngatur tiga siri penemuai `Future of Miri’ (Pendiau Miri Dudi Hari) iya nya program bejalai ngulihka penemu enggau timbal ari peranak Miri.

    UPP sebedau tu bisi ngatur randau dikemujurka Raban Pengereja Pengawa Bejalai (MAT) ba palan ke suah dilawa temuai kelebih agi ba sitak. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads