Header Ads

  • Baru Nyadi

    ‘Anjung Usahawan’ diperambu ditumbuh di menua Song

    Malcom Mussen Lamoh
    KUCHING: Opis Menteri Pemansang Industri enggau Orang Dagang berunding deka numbuhka sebuah ‘Anjung Usahawan’ ba kandang menua Song.

    Menteri Muda Industri enggau Pemeranak Puku, Malcom Mussen Lamoh madah, nya dikena napi peminta guna orang dagang ba kandang menua nya enggau ke ngelingi.

    “Opis menteri aku berundingka deka numbuhka sebuah anjung usahawan endur orang dagang menua nya beoperasyen sereta besemekih ba palan ti strategik tauka patut.

    “Anjung usahawan tu ulih nyadi palan endur ngumpul, proses, nyual sereta ngagih produk orang dagang menua nya kelebih agi ba Song sereta ke ngelingi,” ku iya lebuh ke nyaut tanya tambah ari Ambrose Blikau Enturan (BN-Katibas).

    Mussen mansutka pekara nya maya sesi tanya saut Aum Kedua Penggal Kedua Aum Kunsil Nengeri (DUN) Sarawak Ke-18 ke diatur ba Kompleks DUN ditu, kemari.

    Iya madahka langgur penemu numbuhka anjung usahawan nya ulih diperundingaka berindik ari palan industri di Song bedau ulih ditumbuhka.

    Taja pia ku iya, perintah udah ngelala palan ke patut nyadi palan industri di Song.

    “Seiti endur udah dikelala ulih nyadi palan industri di Song, opis menteri aku benung minta ungkup belanja ari baruh Pansik Separuh Penggal RMK-11 jemah ila,” ku iya.

    Berebak enggau tu iya madahka opis menteri deka chakah agi ngatur aktiviti enggau program mantu orang dagang dikena ngangkat sereta nambahka pengelandik orang dagang.

    Ku iya entara program ke deka diatur baka pengawa pemandang orang dagang, latih, program pemansang produk enggau ngelakuka produk. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads