Header Ads

  • Baru Nyadi

    Bajet 2018, ngenyampatka pemansang nengeri

    Datuk Patinggi Abang Johari Tun Openg
    Perintah nengeri udah ngungkupka RM8.226 billion ke belanja dikena ngaga pemansang enggau operasyen.

    KUCHING: Perintah ngungkupka belanja urung RM8.226 billion ti mungkur belanja pemansang enggau operasyen dalam Bajet 2018.

    Kepala Menteri Datuk Patinggi Abang Johari Tun Openg madahka ungkup belanja nya dikena bejalaika pemansang enggau operasyen nengeri.

    “Ba langgur Bajet 2018, sepenyampau RM5.745 billion tauka urung 70 peratus ari penyampau bajet nya dilanggur ungkup pemansang lalu urung RM2.481 billion tauka 30 peratus diperambu ungkup belanja operasyen,” ku iya.

    Abang Johari ti mega Menteri Wang enggau Pengatur Ekonomi mansutka pekara nya dalam Bajet 2018 Sarawak lebuh ti bejuraika Rang Undang-Undang Perbekalan (2018), 2017 ba hari keterubah Aum Kedua Penggal Kedua Kunsil Nengeri Sarawak Ke-18 ba Kompleks DUN ditu, kemari.

    Bejaku baru, iya madahka perintah nengeri terus chakah bejalaika mayuh program enggau projek dikena ngenyampatka pemansang nengeri.

    Iya madahka perintah nengeri deka majak chakah ngemansang menua pesisir dikena nyapai juluk pemansang muka peluang ti besai agi ba kandang menua pesisir enggau menua ulu ke pengelantang ekonomi raban bansa menua pesisir nengeri tu.

    “Ari semua langgur belanja pemansang, urung 53 peratus diungkup ngagai menua pesisir dalam 2018 tauka urung RM3.062 billion.

    “Ungkup belanja (2018) ke sekali tu besai agi dibandingka enggau RM2.65 billion ba taun 2016 enggau RM2.982 billion dalam taun 2017,” ku iya.

    Nambahka nya, iya minta raban biak di mengeri ulih lantang agi ngena perengka guna ke bisi disediaka ke tuju pemansang pengelandik tauka penau sereta ngelakuka peluang inovasyen enggau orang dagang kelebih agi bekaul enggau digital.

    Lebuh ke ngenang ekonomi digital ke nyadi pengubah besai ekonomi menua, iya madahka nya nyengkaum stratergi ekonomi baru dalam perambu bajet 2018 nengeri.

    Langgur bajet 2018 deka nyukung juluk perintah nengeri ti deka ngemesaika peluang teknologi digital lalu mai Sarawak ngagai dunya digital, ku Abang Johari seraya madahka nya juluk iya deka nyadika nengeri tu “S-Sarawak” iya nya reti “s” Smart.

    Berindik ari pekara nya iya perintah nengeri ngungkupka RM1 bilion dikena ngemanahka program enggau perengka guna digital nengah inisiatif Ekonomi Digital Sarawak, kelimpah numbuhka Sarawak Multimedai Authority (SMA).

    “Agenda transformasyen Sarawak deka dipajakka nyengkaum transformasyen sosial ekonomi, transformasyen menua pesisir enggau transformasyan sistem meri servis, lalu ba taun 2018 ungkup belanja deka disediaka dikena neruska pengawa bejalaika beberapa Key Result Areas (KRA) ari baruh inisiatif transformasyen,” ku iya ti mega madahka langgur belanja 2018 ke bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads