Header Ads

  • Baru Nyadi

    Gempuru likun ke diatur SADIA dikena negika hak tanah NCR

    Wellie Henry Majang
    SIBU: Penemu seiku pengari rayat ti nagang mensia mayuh datai ngulu pengawa gempuru likun kena 13 November ba Tebing Sungai Kuching patut diperatika peranak asal menua tu.

    Presiden Dayak Think-Tank Group (DTTG) madah Wellie Henry Majang madah, pengawa ke diatur nya besai amat reti ngagai peranak asal menua tu dikena ngeringka hak diri ba tanah adat Bumiputera (NCR).

    “Kitai udah meda bansa Dayak udah alah bepuluh iti kes bekaul enggau NCR ba kort.

    “Tu enda nyengkaum abis nadai 400 iti kes agi enggi beribu iku ruang bilik ti bedau tembu bechara.

    “Tu nejuka orang rumah panjai nyau ngampar ba tanah diri empu ke udah dikereja kompeni besai nyema agi alah bechara ba kort.

    “Nya alai, ulah ti nagang mensia mayuh ngulu gempuru likun tu enda patut disebut siku pengari rayat enti iya endang ngemeratka pengidup bansa Dayak ba menua tu,” pia ku iya madah, kemari.

    Nambahka jaku iya baru ku Wellie, nadai orang nagang enti ngemansangka tanah di menua tu tang pengawa ke enda patut dikereja iya nya anang ngambi Pulau Galau enggau Pemakai Menua (PMPG) ari peranak asal.

    “Di Sarawak, chara ke pemadu engkeman sereta muntang dikena mutarka isu PMPG iya nya semina ngubah Kanun Tanah Sarawak aja ti ngaku konsep PMPG dalam dalam undang-undang.

    “Tang iya ke ngasuh pekara tu bepenanggul iya nya perintah mengkang madahka undang-undang adat lama bansa kitai enda engkeman agi dikena maya hari tu.

    “Tu dipeda ari pemutus Kort Besai nginsil pemutus Kort Ngapil lalu mutuska PMPG nadai kuasa ba undang-undang,” ku iya madah baru.

    Meri chunto ke nyemetak, ku Wellie, enti orang datai ke rumah lalu enchuri barang dalam rumah tang maya ke bechara ba kort orang ke beempu rumah dipinta nerangka pengamat rumah nya endang enggi sida tang orang ke enchuri enda ditanya.

    “Ditu kitai meda patut ke enda pekara tu? Patut ke enda bansa kitai Dayak ditanya amat ke enda tanah nya endang tanah kitai tang orang bukai ke datai ngambi tanah nya enda ditanya tauka dipansik?

    “Kati asai kitai? Enda patut kitai beterima kasih ngagai orang ke enchuri hak kitai,” ku iya terang madah.

    Kelimpah ari nya, Wellie madah, laban ke nyadi bansa majoriti di Sarawak, patut bansa tu berasai enda lantang ati laban ke agi jauh tinggal pemansang ari orang ukai taja ba sempekat penumbuh menua Malaysia bisi madah bekunsika ‘pengelantang’.

    “Kitai enda patut dichiping, nyentuk diatu nyau mayuh bala kitai madahka diri baka ke enda dikeibuh taja endang berupai nyukung sapa ke megai perintah menua tu kenyau ari suba.

    “Nama kebuah bebendar nyukung perintah tang agi ngasaika diri baka ke dichiping?

    “Tu semina kitai empu aja ulih nyaut,” pia ku iya madah baru.

    Ketegal nya, Wellie ngarap bendar pengawa gempuru likun ke deka diatur Serakup Dayak Iban Sarawak (SADIA) tu ila ulih matak penatai mayuh peranak asal menua tu.

    Semua tu ku iya ketegal deka minta perintah nengeri ngubah undang-undang tanah sereta ngaku konsep PMPG dalam undang-undang tanah Sarawak. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads