Header Ads

  • Baru Nyadi

    Ketuai komuniti patut beserakup enggau pangan diri

    NGETANKA PENYERAKUP: Dr. Penguang (duduk tengah) enggau Sherina (dua kiba) begambar begulai enggau pesereta sereta temuai dipebasa ke udah ngemujurka Licha Ketuai Komuniti DUN N76 Marudi ba Hotel Mega, kilah ensana.
    MIRI: Ketuai komuniti kelebih agi ari komuniti Iban di sitak Marudi sekali agi dilalau enda agi masau jam belaya enggau pangan diri, laban pekara tu enda pulaika pemaik ngagai semua tang semina deka ngemaluka diri empu.

    Menteri Muda Kaunsil Kandang Menua Datu Dr Penguang Manggil nyemetak minta sida bala ketuai komuniti ngambika seruran berunding ke mua lalu nejuka laya lama ti semina mai pengerugi.

    Ku Dr Penguang madah, penguji ti paling besai iya nyadi pengari rayat sepengudah menang Pengawa Bepilih Nengeri (PRN) 2016 iya nya deka ngempung bala tuai rumah di sitak nya ke sebedau tu udah pambar enda begulai enggau pangan diri.

    “Beserimbai enggau nya, aku ngarapka bala tuai rumah ke dipilih ulih megai tanggungpengawa sida enggau lurus sereta komited.

    “Tu endang udah nyadi tanggungpengawa aku ti paling besai, semina rumah panjai di Marudi aja ti bisi dua iku tuai rumah dalam sebuah rumah panjai. Pengawa aku iya nya ngempung sida enggau meri tanggungpengawa ngagai peranak di rumah panjai nya ngambika milih semina siku aja tuai rumah ti endang ngembuan pengulih nyadi ketuai,” ku iya bejaku ba pengerami nangguh Licha Ketuai Komuniti DUN N76 Marudi ba Hotel Mega ditu, kilah ensana.

    Bisi 184 iku ketuai komuniti ari 184 buah rumah panjai sereta mega ketuai kaum ari komuniti China enggau Melayu ari sitak Marudi datai ngulu licha nya ke diatur Opis Menteri Muda Kaunsil Kandang Menua enggau kerejasama Opis Residen Miri, Opis Pelilih Marudi sereta Opis Pelilih Beluru.

    Ba lansa bekaul licha nya, ku Kaban Kunsil nengeri (ADUN) Marudi nya madah, iya ngarapka ulih nyerakupka semua ketuai komuniti ngambika ulih bekerejasama enggau perintah seraya enda nekul pejalai projek pemansang ke endang udah dilangkar.

    “Batang tuju opis menteri tu ngaga licha tu kebendar ngambika bala tuai rumah ti belaya enggau pangan diri sebedau PRN ulih begulai baru lalu mekuh ngagai pengawa ngemansangka rumah panjai sida. Kitai suntuk jam enti semina belaya ketegal pekara mit.

    “Ba pengerami tu, kitai mega udah nyuaka surat nyiri baru enggau mega ke baru dichiri ngagai lebih 40 iku tuai rumah sereta ketuai komuniti. Pengawa meri surat tu digaga berenggat,” ku Pengaung nandu.

    Sama bisi datai ba pengerami nya Residen Miri Sherina Hussaini, pengari ketuai komuniti sitak DUN Marudi Pemancha Enggah Nuga, Pemesai Pelilih Beluru Mohd Rashdan Hazemi enggau Chairman Kaunsil Pelilih Marusi Edward Mendai. #UtusanBoreno

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads