Header Ads

  • Baru Nyadi

    PBJ ngempung, nyerakup pupu bansa ari Sarawak di Johor

    PASAR BORNEO JOHOR: Gaya mensia mayuh kelebih agi peranak Sarawak ti diau mendam di menua nya benung kiruh bejual bebeli ba pasar nya.
    KUCHING: Gerempung Pedaja, Pedagang enggau Industri Mit Sereta Jelan Pemesai (IKS) Borneo Johor Bahru tauka dikelala agi enggau nama Gerempung Borneo Johor (PBJ) udah ditumbuh kena bulan Mac taun 2007.

    Keterubah ditumbuh, gerempung tu bisi 543 iku kaban ke ari mayuh bengkah pupu bansa ti datai ari Negeri Sarawak ti diau mendam di Pasir Gudang, Johor.

    Gerempung Borneo Johor tebilang nama ketegal ulih ngempung pupu bansa ari Borneo kelebih agi ari Sarawak ngambika begulai, bekelala,bekerejasama sereta beserakup enggau pangan diri nyengkaum enggau peranak asal di  menua nya.

    Kelimpah ari nya, gerempung tu mega  pegari nama ketegal mujur numbuh sereta ngatur manah pasar Borneo ti dibuka ba Jalai Bayan31/1, Taman Megah Ria, 81750 Masai, Johor.

    Nitihka sejarah, peranak  ari Sarawak ke diau mendam di menua nya berengkah bejalaika aktiviti dagang ba pun taun 2006, ke alai maya nya sida semina bejual ba kaki lima kedai sereta nadai lisin.

    Ketegal nya, sida suah ditangkap raban penerit adat MBJB.

    Maya nya, betuaika En. John Anak Chandang sereta dibantu Bong Chow Wei lalu minta jaku lalau ari Tn. Haji Rahim bin Latif (Ketuai Menua nya) sereta disukung YB Tan Sri William Mawan Ikom, ngambi numbuhka sebuah gerempung awakka sida ulih minta palan endur bejual ari MBJB.

    Kena bulan Mac taun 2007, pinta nya udah disukung YAB Dato’ Klaled bin Nordin (MP Pasir Gudang) maya nya, sereta dikemendarka kena 28 Mei 2008.

    Keterubah muka Pasar Borneo, gerempung  nya udah nerima agih belanja ari YB Tan Sri William Mawan dikena nyuwa opis sereta meli perengka dikena ba opis.

    Berengkah ari  nya, Gerempung Pasar Borneo Johor enda malik agi ke belakang sereta majak nyingkang ke mua ti ngujungka sida bulih pemujur lalu jelai rita di menua Johor.

    Berindik ari nya, Pasar Borneo Johor udah diakun Perintah Negeri Johor ke ari baruh pegai YAB Dato’ Mohammed Khaled Nordin enggau Majlis Bandaraya Johor (MBJB) nyadi palan matak temuai ba taun 2014, ti ngujungka sida udah diberi ungkup belanja RM 350,000 dikena ngaga sebuah palan ke beperabung.

    PBJ udah dikearapka Unit Pemansang Orang Dagang Bumiputera Sarawak (Opis Kepala Menteri Sarawak) ngemujur program Pemandang Orang Dagang Bumiputera Sarawak, kenyau ari taun 2012 nyentuk 2016 di Plaza Ansana Johor.

    Gerempung nya mega mujur nyerakup peranak Sarawak nyukung polisi Perintah Negeri Johor ari baruh pegai Barisan Nasional (BN), muka peluang dagang ngagai peranak Sarawak, Sabah  enggau menua nya empu, numbuhka wang turu penusah ngenyit, mutarka penusah pemati sereta nganjung pulai bangkai ke menua asal, mgerembaika kaul enggau perintah Negeri Johor nyengkaum ngemujurka program baka Local Agenda 21,Pengerami Begulai enggau Peranak Sarawak, Gawai Dayak, Ngiling Tikai,Program Pengerai, Program Modal Mensia, Ngintu Hari Malaysia enggau Krismas kenyau ari taun 2008 nyentuk ke diatu.

    Kelimpah ngintu bala pedaja enggau pedagang ba Pasar Borneo nya,gerempung tu mega bisi tuju bukai dikena nyerakup lalu ngenyemakka diri enggau peranak Sarawak di menua nya.

    Entara pekara ti dipejalaika sida baka madah ngagai mensia mayuh sentang pekara baru kelebih agi peluang gawa enggau dagang, mantu peranak ari Sarawak ngiga kereja di Johor, ngatur aktiviti enggau program, pengerami main enggau adat asal bansa Dayak, ngatur kus, seminar ke bekaul enggau kereja sereta dagang, ngatur program modal mensia ungkup peranak Sarawak enggau kaban gerempung, numbuhka duit turu pelajar ungkup peranak ari Sarawak enggau kaban gerempung sereta mupu duit ungkup duit turu dikena mantu peranak ari Sarawak ke napi penusah enggau semua kaban gerempung ke berejista.

    Diatu, PBJ diiring Donny Linan ke nyadi Chairman dibantu Resen Anak Deli ke nyadi Sapit iya.

    Beserimbai enggau penatai Hari Krismas ke deka diintu dalam bulan Disember tu ila, PBJ bisi ngatur Pekit Pasar Borneo Idol 2017 ke deka diatur kena 2-3 Disember tu, lalu pengerami nyuaka perais deka diatur kena 10 Disember ke disempulang enggau program bejadika E-Paper Utaran Borneo, Borneo Post enggau See Hua.

    Temuai dipebasa ti dipelaba datai bejadika pengerami nya ila, YAB Dato’ Mohammed Khaled Nordin  enggau Sapit Kepala Menteri Sarawak Datuk Amar Douglas Uggah Embas. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads