Header Ads

  • Baru Nyadi

    SRDC bisi nyediaka palan ungkup ‘buskers’ merindang di Pasar Malam Sibu Jaya

    Sempurai Petrus Ngelai
    SIBU: Opis Kaunsil Menua Pesisir Sibu (SRDC) udah nyediaka palan alai ‘buskers’ mantaika pengelandik sida ba Pasar Malam Sibu Jaya.

    Chairman opis tu, Sempurai Petrus Ngelai madah, pekara tu dikeandal deka ngerichahka agi pasar malam nya.

    “Kitai deka ngangauka raban ‘buskers’ datai mantaika pengelandik ti ukai semina dipelabaka deka matak penatai sida ke rindu musik tang mega mensia mayuh nyengkaum orang di Sibu Jaya empu,” pia ku iya madah.

    Ku iya, iya andal amat Pasar Malam Sibu Jaya ti baru belabuh dibuka nya deka terit agi udah tu ila.

    Kelimpah ari nya, Sempurai madah, tu bela deka meri awak sida ti rindu ke musik datai mandangka pengelandik diri empu.

    “Aku ngasaika pekara tu deka mai pemaik ngagai semua baikka sida ti rindu ke musik, orang bejual ba pasar malam tauka mensia mayuh ke diau di Sibu Jaya,” ku iya madah baru.

    Pasar Malam Sibu Jaya bisi lebih kurang 100 iti kedai nyual macham bansa barang baka barang pemakai enggau ai irup lalu dibuka ari 4 lemai nyentuk 11 malam berengkah hari Lima nyentuk hari Minggu.

    Nimbal tanya sentang penyampau hari pasar malam nya dibuka, ku Sempurai naka kediatu, tiga kali seminggu chukup dikena ngepunka pasar malam baru nya.

    “Taja kitai bisi nerima peminta minta pasar malam nya suah agi dibuka tang piak kitai deka mansik dulu pekara nya dalam kandang beberapa bulan ti deka datai.

    “Tang taja pan baka nya, kitai deka nambahka penyuah pasar malam tu dibuka nyema mensia mayuh majak minta,” pia ku iya madah. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads