MAGIC nyediaka palan, perengka guna dikena bedagang - Berita Iban Online

Berita Terbaru


Post Top Ad


Post Top Ad

Thursday, December 7, 2017

MAGIC nyediaka palan, perengka guna dikena bedagang

Tan Sri Mohd Irwan Serigar Abdullah
KUCHING: Palan Kreativiti Global Inovasi Malaysia (MAGIC) di Sarawak deka nyendiaka perengka guna ke meri pengelantang pendiau ngagai nembiak tauka orang ke baru deka bedagang lebuh sida ngelawa tauka ngena palan nya ngaga aktiviti sida iya.

Kepala Sekretari sereta Kepala Servis baruh pegai Opis Menteri Wang, Tan Sri Mohd Irwan Serigar Abdullah madahka palan MAGIC Sarawak agi kurang endar perengka guna ke ulih dikena nembiak lebuh sida ngelawa endur nya, ku iya.

“Gaya MAGIC Sarawak baka kediatu, enda ngipak sebuah palan ke meri pengelantang ngagai bala nembiak, ngujungka palan tu enda nerima timbal ke manah, ke enda ngipa pemerat nembiak moden baka kemaya hari tu,” ku Irwan.

Iya madah munyi nya lebuh bejaku nyaut sekeda tanya ari bala nembiak sereta orang dagang SME ke bisi ngenataika diri ngagai atur pengawa randau ‘Only One with: Ask Me Anything” di MAGIC Sarawak ditu, kemari.

MAGIC Sarawak ke bepalan di sitak Pending, deka disediaka enggau perengka guna lumba enggau main dalam kandang tiga bulan tu ila.

Irwan nandu baru madahka palan MAGIC Sarawak nya ila deka nyendiaka kort badminton, futsal sereta sekeda bansa lumba enggau main bukai ke bekonsepka lumba enggaumain niki (rock climbing) tiru.

“Nya alai, aku minta opis ke betanggungjawab sereta nyaga palan tu, nyendiaka perengka guna chukup ke bala nembiak ke datai kitu ngena perengka guna ditu.

“Nyangka ke pemungkal iya, sida iya ulih ngaga kedai makai, kedai ke bisi nyual mayuh macham barang, kedai bup mini sereta kedai perengka guna komunikasi sereta gajet digital.

“Ba aum aku enggau sida ke ngatur sereta nyaga MAGIC Sarawak tadi, aku udah madahka aku deka meda palan tu bisi endur nembiak belumba enggau main, lalu arapka dalam kandang tiga bulan tu, endur lumba enggau main nya udah bisi sereta tembu digaga.

“Laban aku nemu, dalam pendiau kitai ninting hari, kitai enda tau enda gawa, makai sereta merindang ati tauka bemain. Lebuh aku datai ditu tadi, nadai siti utai ke berat endar tu bisi digaga ditu,” ku iya.

Mohd Irwan ti mega nyadi chairman MAGIC madahka MAGIC Sarawak enda tau enda nyendiaka endur ke ngelantangka ati sereta likun, ngambika iya ulih matak mayuh agi bala nembiak kia.

Kelimpah ari nya iya madah, MAGIC Sarawak mega patut nyendiaka endur bala nembiak ke ulih beperindang, main musik ‘busking’, ngambika dipeda enda kelalu sunyi.

“Aku beratika endur tu tadi, nyerumba baka pesaka ke dilalai, ke enda dijaga enggau manah. Palan tu enti disedia enggau mayuh macham palan, tentu iya dipeda ‘idup’ endar, lalu pelaba aku pan, bala nembiak sanggup sida iya ngambiska jam sida iya ditu 24 jam,” ku iya, lalu nandu baru, palan nya nyerumba siti pasar baru ke ulih alai nembiak ngiga penemu sida ke kreatif sereta berinovasi.

MAGIC Sarawak @ Borneo 744 keterubah nya dibuka dalam bulan Mei taun siti nyin tadi lalu iya nyadi palan MAGIC keterubah dibuka di luar Cyberjaya.

Palan tu digaga perintah iya nya dikena mai sereta enggau meransang ngangkatka ekosistem nyadi orang dagang, ke ulih nambah ekonomi menua tu nengah bala nembiak di serata menua tu, kelebih agi dalam pengawa ke digaga sida iya nengah kreativiti enggau inovasi.

Sama bisi enggau ngulu atur pengawa nya kemari,Sapit Sekretari Perintah Menua Sarawak, Datu Jaul Samion,  Community and Outreach Lead, MAGIC Sarawak, Amirin Arsyan, enggau Ketuai Pegawai Eksekutif MAGIC, Ashran Dato’ Ghazi. #UtusanBorneo

No comments:

Post a Comment

Post Top Ad