Siku deriba motosikal tepelanting ke dalam parit
Cari Berita

Advertisement


Siku deriba motosikal tepelanting ke dalam parit

Staf @beritaibanMY
August 30, 2018

BA PALAN PENUSAH NYADI: Raban bomba enggau ambulance benung nulung sereta deka nyelamatka mansa ke tepelanting sereta labuh ke dalam parit.

BINTULU: Siku deriba motosikal balat bakal sepengudah tepelanting ke dalam parit maya motosikal ke ditepan iya belantak enggau sebuah kerita ba simpang jalai masuk besemak endur Opis LAKU Bintulu ditu, pagi kemari.

Ketuai Balai Bomba enggau Penyelamat (BBP) Bintulu TPgB Mohamad Meramit, madah raban bomba bisi nerima kangau bekaul enggau eksiden nya urung 11.18 pagi. Sebuah jentera FRT BME enggau beberapa iku raban bomba diketuaika PBK II Mustapha Wasli, berumban ngesah ke palan penusah nyadi.

Ku iya, raban polis, siku penguasa agensi perintah ditu, raban perubat enggau ambulans mega berumban ke palan penusah nyadi.

“Maya raban bomba datai ba palan penusah nyadi, sebuah motosikal enggau sebuah kereta (dua mansa orang ke deriba enggau penumpang) eksiden enggau deriba motosikal dipechayaka tepelanting ke dalam parit,” ku iya maya ke dirandau pengarang berita kemari.

Berindik ari nya, ku iya, operasyen nyelamatka mansa lalu dipejalaika nanggung mansa ke balat bakal ba parit nya enggau nyuaka tubuh iya ngagai raban ambulans laban deka dianjung ke Sepital Bintulu ngambika ulih diperubat silik agi enggau operasyen nyelamatka mansa tembu urung jam 11.34 pagi.

Naka kediatu, kebuah eksiden nyadi agi dipansik raban polis.