27 October 2018 - Hari Enam ba Minggu Ke Dua Puluh Sembilan Musim Selama
Cari Berita

Advertisement

27 October 2018 - Hari Enam ba Minggu Ke Dua Puluh Sembilan Musim Selama

Staf @beritaibanMY
October 27, 2018

Aku madah ngagai kita, ukai baka nya; Tang enti kita enda nesal ati ke dosa kita, semua kita deka mati baka sida.”
27 October 2018 - Hari Enam ba Minggu Ke Dua Puluh Sembilan Musim Selama

Bacha Ke Satu:

Epesus 4: 7 - 16

Menyadi:
Genap iku kitai udah diberi pengasih nitihka pemesai ungkup ti diletak Kristus.
Nya kebuah Bup Kudus nyebut, 

“Lebuh Iya niki ke atas ngagai endur ti pemadu tinggi, Iya mai mayuh orang tangkap enggau Iya; Iya meri pemeri ngagai mensia.”

Nama reti “Iya niki”? Reti nya, terubah, Iya nurun ngagai buntut dunya. 

Iya ke nurun nya mega Iya ke niki ke atas jauh ngilah semua langit, ngambika Iya ngemenuhka semua utai enggau Iya Empu.

Iya nya ke meri pemeri ngambika sekeda nyadi rasul, sekeda nyadi nabi, sekeda nyadi penginjil, sekeda nyadi gembala lalu sekeda nyadi pengajar, kena nyikap  nembiak Tuhan ngereja pengawa orang Kristian, kena ngemansangka tubuh Kristus, datai ke semua kitai nyau segempung magang dalam pengarap, sama sepenemu pasal Anak Allah Taala, nyadi orang ke besai tuai lalu nyadi sebaka enggau Kristus.

Kitai enda tau agi nyadi anak mit ke dikebu lalu ditabanka kia-kia ulih genap macham ajar ti datai ari akal mensia, enggau ulih kelakar orang ke nipu.

Tang kitai patut bejakuka pasal utai ti bendar dalam pengerindu, mansang dalam semua utai ngagai Iya ke nyadi kepala, iya nya Kristus, ke bejantilka semua perengka tubuh, lalu nanggam sida ngena semua rakat ti diberi ngagai tubuh nya, lalu ngasuh semua perengka tubuh nya sama bekereja enggau menyana ngemansang lalu niri negika tubuh nya dalam pengerindu.

Masmur Entara:

Masmur 122: 1 - 2, 3 - 4AB, 4CD - 5

Saut (peda 1): Aram kitai mansang ngagai rumah TUHAN enggau gaga ati.

Ke Satu
Aku gaga ati lebuh sida bejaku enggau aku, “Aram kitai mansang ngagai rumah TUHAN.” Lalu diatu kitai bisi ditu, bediri ba mua pintu nengeri Jerusalem!

Saut: Aram kitai mansang ngagai rumah TUHAN enggau gaga ati.

Ke Dua
Jerusalem udah digaga nyadi nengeri 
ti manah gaya sereta betul atur. Tu meh endur alai raban bansa datai.

SautAram kitai mansang ngagai rumah TUHAN enggau gaga ati.

Ke Tiga
Raban bansa orang Israel, meri terima kasih ngagai TUHAN. Tu meh endur alai sida raja orang Israel duduk ngakim bala nembiak sida.

SautAram kitai mansang ngagai rumah TUHAN enggau gaga ati.

Alleluia (peda Esekiel 33: 11)

Alleluia, alleluia
Aku enda rindu meda orang ke bedosa mati, ku TUHAN, tang Aku rindu agi meda sida badu agi bedosa, lalu idup.
Alleluia.

Bacha Injil:

Luke 13: 1 - 9

Lebuh maya nya sekeda orang ke bisi dia madah ngagai Jesus pasal darah orang Galili ti udah dichampurka Pilate enggau piring sida.

Jesus lalu nanya sida, “Kati kita ngumbai orang Galili nya diperinsaka baka nya laban sida balat agi bedosa ari orang Galili ti bukai?

Aku madah ngagai kita, ukai baka nya; Tang enti kita enda nesal ati ke dosa kita, semua kita deka mati baka sida.

Tauka orang ke lapan belas iku ke mati lebuh Menara Siloam runtuh ninggang sida -- kati kita ngumbai sida nya udah balat agi ngereja penyalah ari semua orang bukai ke diau di Jerusalem?

Aku madah ngagai kita, ukai baka nya; Tang enti kita enda nesal ati ke dosa kita, semua kita deka mati baka sida.”

Udah nya Iya lalu madahka sempama tu: “Orang siku nanam sepun kayu ara ba kebun anggur iya. Iya datai deka ngiga buah ba kayu ara nya, tang nadai tetemuka buah dia.

Nya alai iya lalu bejaku ngagai tukang kebun, ‘Peda nuan, tu ketiga taun aku udah datai begigaka buah ba kayu ara tu, tang aku nadai kala tetemuka buah.

Tebang iya! Nama guna nejuka iya masau tanah nya ngapa?’

Tukang kebun nya lalu nyaut, ‘Awakka iya dia setaun da agi, tuan. Aku deka nyangkul ngelingi pun iya, lalu meri iya baja.

Enti iya bebuah taun baru tu ila, manah meh nya. Tang enti iya enda, nuan tau nebang iya.’”