13 December 2018 - Hari Empat ba Minggu Kedua Musim Penatai (Adven) (Memorial of Saint Lucy, Virgin and Martyr)
Cari Berita

Advertisement

13 December 2018 - Hari Empat ba Minggu Kedua Musim Penatai (Adven) (Memorial of Saint Lucy, Virgin and Martyr)

Chief Editor | Berita Iban MY
December 13, 2018

Memorial of Saint Lucy, Virgin and Martyr.

13 December 2018 - Hari Empat ba Minggu Kedua Musim Penatai (Adven) (Memorial of Saint Lucy, Virgin and Martyr)

Bacha Ke Satu: Isaiah 41: 13 - 20

Aku tu TUHAN Allah Taala kita. Aku ngasuh kita kering lalu madahka ngagai kita, ‘Anang takut. Aku deka nulung kita.’

Ku TUHAN bejaku, “Israel, taja pen kita bansa ti mit sereta lemi, tang kita enda tau takut. Aku deka nulung kita. Aku, Allah Taala ke disembah orang Israel ti kudus, deka nebus kita.

Aku deka ngaga kita baka papan alai ngindik gandum, bisi gigi ti agi baru sereta tajam. Kita deka ngindik bukit lalu ngerusak sida. Munggu deka pechah nyadi amau.

Kita deka ngebuka sida ngagai angin. Ribut deka nabanka sida, lalu sida deka ngachir laban kabut. Nya baru kita deka lantang, laban Aku tu Allah Taala kita. Kita deka muji Aku, Allah Taala ke disembah orang Israel ti kudus.

Lebuh bala nembiak Aku beguna lalu begigaka ai, lebuh batang rekung sida nyau rangkai laban aus, nya baru Aku, ti TUHAN, deka nyaut sampi sida. Aku, ti Allah Taala ke disembah orang Israel, enda sekali-kali ninggalka sida.

Aku deka ngasuh ai sungai rarat ba bukit ti nadai tumbuh kayu lalu mata ai rarat ba lebak. Aku deka ngubah menua puang nyadi letung lalu tanah ti rangkai nyadi mata ai.

Aku deka ngasuh kayu sidar, kayu akasia, kayu matil enggau kayu kana tumbuh di menua puang. Utan pain, Juniper enggau saipris deka tumbuh di menua puang.

Orang deka meda nya, lalu sida deka nemu Aku ti TUHAN, udah ngereja utai nya. Sida deka nemu Allah Taala ke disembah orang Israel ti kudus udah ngasuh utai nya nyadi.”

Masmur Entara: Masmur 145: 1 & 9, 10 - 11, 12 - 13AB

Saut (peda 8): TUHAN endang rindu sereta kasih, lubah ringat sereta penuh laban pengerindu.

Ke Satu
Aku deka ngemesaika Nuan, O Allah Taala enggau Raja aku.
Aku deka meri terima kasih ngagai Nuan belama lama iya.
Iya manah enggau semua orang lalu siru enggau semua utai ti udah digaga Iya.

Saut: TUHAN endang rindu sereta kasih, lubah ringat sereta penuh laban pengerindu.

Ke Dua
Semua utai ti idup ti udah digaga Nuan, O TUHAN, deka meri terima kasih ngagai Nuan, lalu semua nembiak Nuan deka muji Nuan.
Sida deka bejakuka pasal mulia diraja Nuan lalu madahka pasal kuasa Nuan.

SautTUHAN endang rindu sereta kasih, lubah ringat sereta penuh laban pengerindu.

Ke Tiga
Ngambika semua orang nemu pemesai pengawa Nuan
enggau pemesai mulia perintah Nuan.
Perintah Nuan endang meruan belama iya, lalu Nuan nyadi Raja belama iya.

SautTUHAN endang rindu sereta kasih, lubah ringat sereta penuh laban pengerindu.

Alleluia (peda Isaiah 45: 8)

Alleluia, alleluia
Awakka pemenang nurun ari langit baka ujan, lalu tanah deka ngasuh pengelepas tumbuh.
Alleluia.

Bacha Injil: Matthew 11: 11 - 15

Ku Jesus bejaku ngagai orang mayuh:

“Enggau bendar Aku madah ngagai kita, ari semua orang ke udah diadaka, nadai siku ke besai agi ari John Pemaptisa. Tang Iya ke pemadu mit dalam Perintah serega, lebih agi besai ari iya.

Kenyau ari maya John Pemaptisa, nyentuk ngagai diatu, Perintah serega udah balat diserang,  lalu orang ke mangah nguji ngerampas Perintah nya ngena chara ti kasar.

Laban semua sida nabi enggau Adat Moses udah benabi nyentuk ngagai maya John datai, lalu enti kita deka nerima pesan sida, John nya meh Elijah ke deka datai.

Awakka orang ke bisi pending, ninga.”