Header Ads

  • Baru Nyadi

    28 December 2018 - Hari Ke-empat Nyentuk Ngagai Octave Krismas (Feast of the Holy Innocents, martyrs)

    Feast of the Holy Innocents, martyrs.

    28 December 2018 - Hari Ke-empat Nyentuk Ngagai Octave Krismas (Feast of the Holy Innocents, martyrs)

    Bacha Ke Satu: 1 Saint John 1: 5 - 2: 2

    Tu pesan ti udah didinga kami ari Iya, lalu dipadahka kami ngagai kita, iya nya, Allah Taala nya penampak, lalu dalam Iya nadai pemetang.

    Enti kitai ngumbai diri bisi kaul enggau Iya, tang agi diau dalam pemetang, kitai bula lalu ukai idup nitihka pemendar.

    Tang enti kitai diau dalam penampak, baka Iya ke diau dalam penampak, kitai bisi kaul enggau pangan diri, lalu darah Anak Iya, Jesus, nuchi kitai ari semua dosa.

    Enti kitai madahka diri nadai dosa, kitai nipu diri empu, lalu pemendar nadai dalam kitai.

    Enti kitai ngaku dosa kitai, Iya endang tau dikarapka sereta lurus, lalu Iya deka ngampun kitai ari dosa kitai, lalu nuchi kitai ari semua penyai.

    Enti kitai madahka diri nadai dosa, kitai ngumbai Allah Taala bula, lalu jaku Iya nadai dalam kitai.

    Anak, aku nuliska tu ngagai kita, ngambika kita enda bedosa. Tang enti orang ngereja dosa, kitai endang bisi siku Penyaup ke bejaku ngagai Apai ngarika kitai, iya nya Jesus Kristus ti lurus, ke nyadi piring kena muai dosa kitai, lalu ukai semina dosa kitai aja, tang mega dosa semua mensia.

    Masmur Entara: Masmur 124: 2 - 3, 4 - 5, 7CD - 8

    Saut (peda 7): Semengat kitai udah dilepaska baka burung ti lepas ari panjuk.

    Ke Satu
    Enti TUHAN enda udah setanah enggau kitai lebuh orang nyerang kitai, sida tentu udah nelan kitai idup-idup lebuh sida ringat pedis ati ngagai kitai.

    Saut: Semengat kitai udah dilepaska baka burung ti lepas ari panjuk.

    Ke Dua
    Nya baru ai bah nabanka kitai, lalu ngelamun kitai; lalu kitai lemas.

    Saut: Semengat kitai udah dilepaska baka burung ti lepas ari panjuk.

    Ke Tiga
    Panjuk putus, lalu kitai rari! Penyaup kitai datai ari TUHAN ke ngaga langit enggau dunya.

    Saut: Semengat kitai udah dilepaska baka burung ti lepas ari panjuk.

    Alleluia

    Alleluia, alleluia
    Kami muji Nuan Allah Taala,
    kami ngaku nuan TUHAN;
    bala raban sedadu ti bebaju burak, 
    ti udah lenyau nyawa ketegal Nuan, muji Nuan.
    Alleluia.

    Bacha Injil: Matthew 2: 13 - 18

    Lebuh sida udah mupuk, siku melikat Tuhan pegari di mua Josep dalam mimpi, lalu bejaku ngagai iya, “Angkat nuan. Bai anak mit nya enggau indai Iya rari ngagai menua Ejip. Diau dia nyentuk ngagai maya aku ngasuh nuan ninggalka menua nya, laban Herod baru deka ngiga anak mit nya, lalu munuh Iya.”

    Josep lalu angkat, mai anak mit nya enggau indai Iya malam nya, lalu mupuk ngagai menua Ejip.

    Sida diau di menua nya nyentuk ngagai maya pemati Herod. Tu ngamatka jaku ti udah disebut Tuhan beseruanka siku nabi, “Aku ngangauka Anak Aku pansut ari menua Ejip.”

    Lebuh Herod nemu diri udah ditipu orang ke pandai pasal bintang nya, iya pedis ati. Iya lalu meri atur ngasuh semua anak mit ke lelaki, ke umur dua taun ke baruh, di Betlehem enggau di menua ti ngelingi nengeri nya, dibunuh magang, nitihka maya ti udah ditemu iya ari orang ke pandai pasal bintang nya.

    Nya meh jalai jaku Tuhan ti disebut nabi Jeremiah dikamatka:

    “Munyi nyawa bisi didinga di Ramah, munyi orang ke bekeduie nyabak. Rachel nyabakka bala anak iya. Iya enggai diperindang, laban sida nadai agi.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads