13 January 2019 - Hari Minggu Pemaptisa TUHAN (The Baptism of the Lord) - Berita Iban Online | Laman Web Berita Kitai

Header Ads

  • Baru Nyadi

    13 January 2019 - Hari Minggu Pemaptisa TUHAN (The Baptism of the Lord)

    The Baptism of the Lord.

    13 January 2019 - Hari Minggu Pemaptisa TUHAN (The Baptism of the Lord)

    Bacha Ke Satu: Isaiah 42: 1 - 4, 6 - 7

    Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.

    Iya enda manjung tauka merakka nyawa iya tauka bejaku enggau nyawa ti inggar ba sebelah jalai raya.

    Iya enggai matahka buluh ti melepi tauka madamka lampu ti kelap-kelap. Iya tetap deka mai atur ti lurus ngagai semua mensia.

    Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.”

    “Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa. Nuan deka menchelakka mata orang ke buta lalu ngelepaska orang ari rumah jil.

    Tauka: Isaiah 40: 1 - 5, 9 - 11

    “Perindang bala nembiak Aku,” ku Allah Taala kitai bejaku. “Perindang sida! Peransang orang Jerusalem. Padahka ngagai sida, sida udah chukup lama natka diri merinsa, lalu penyalah sida diatu udah diampun. Aku udah ngukum sida enggau chukup ketegal semua dosa sida.”

    Ku munyi nyawa ngangau, “Sediaka jalai di menua puang ke TUHAN! Gaga jalai di menua puang ke Allah Taala kitai!

    Tambun semua lebak. Tumpurka semua munggu enggau bukit. Rataka semua menua ti belenggak-lenggung.

    Nya baru mulia TUHAN deka dipandangka, lalu semua mensia deka meda mulia nya, laban TUHAN udah bejaku.”

    Jerusalem, alai nuan niki ngagai sigi bukit ti tinggi lalu padahka berita manah! Sion, alai nuan ngangau enggau nyawa ti inggar. Padahka berita manah! Anang takut bejaku. Padahka ngagai semua nengeri di menua Judah pasal Allah Taala ti deka datai!

    TUHAN Allah Taala deka datai lalu merintah ngena kuasa, mai upah ke bala nembiak Iya.

    Iya deka ngibun nembiak Iya baka pengibun bedus. Iya deka ngempuruka sida lalu ngerendut sida, lalu mai sida, lalu begadai-gadai nguluka indai sida.

    Masmur Entara: Masmur 29: 1 - 2, 3 - 4, 3B & 9B - 10

    Saut (peda 11b): TUHAN deka meri pemaik ngagai bala nembiak Iya.

    Ke Satu
    Puji meh TUHAN, kita orang serega.
    Puji meh mulia enggau kuasa Iya.
    Puji meh nama TUHAN ti bemulia.
    Meremi di mua Iya ti kudus lebuh Iya pegari.

    Saut: TUHAN deka meri pemaik ngagai bala nembiak Iya.

    Ke Dua
    Nyawa TUHAN bisi didinga di tasik
    lalu munyi nyawa Iya belauh ba tasik.
    Nyawa TUHAN ti bekuasa
    sereta bemulia bisi didinga.

    Saut: TUHAN deka meri pemaik ngagai bala nembiak Iya.

    Ke Tiga
    Allah Taala ti bemulia bejaku munyi guntur
    lalu semua orang dalam Rumah TUHAN
    manjung nyebut, “Muliaka Allah Taala!”
    TUHAN merintah ai ti dalam.
    Iya nyadi Raja belama iya.

    Saut: TUHAN deka meri pemaik ngagai bala nembiak Iya.

    Tauka: Masmur 104: 1 - 2, 3 - 4, 24 - 25, 27 - 28, 29B - 30

    Saut: Puji meh TUHAN, O semengat aku!

    Ke Satu
    O TUHAN Allah Taala aku, naka meh pemesai kuasa Nuan!
    Nuan ngerasukka mulia raja.
    Nuan nyerayung Diri ngena penampak.
    Nuan udah mintarka langit baka langkau kain.

    Saut: Puji meh TUHAN, O semengat aku!

    Ke Dua
    Nuan ngaga rumah Nuan ba atas ai ti di langit
    Nuan ngaga mua hari nyadika kerita perang Nuan
    lalu nepan ba sayap ribut.
    Nuan mai pesan Nuan ngena ribut
    lalu kilat ti nyelar nyadi ulun Nuan.

    Saut: Puji meh TUHAN, O semengat aku!

    Ke Tiga
    TUHAN, Nuan udah ngaga mayuh macham utai!
    Naka meh pemintar Nuan ngaga semua utai nya!
    Dunya nyau penuh laban utai ti idup ti digaga Nuan.
    Tasik ti luas sereta besai pen bisi, endur alai utai ti idup diau,
    ti besai enggau ti mit, ti enda ulih diitung.

    Saut: Puji meh TUHAN, O semengat aku!

    Ke Empat
    Semua sida ngarapka Nuan meri sida pemakai nitihka musin.
    Nuan meri pemakai ngagai sida, lalu sida makai.
    Nuan meri sida pemakai, lalu sida kenyang.

    Saut: Puji meh TUHAN, O semengat aku!

    Ke Lima
    Lebuh Nuan ngambi seput ti meri pengidup,
    sida mati lalu pulai nyadi amau baru.
    Tang lebuh Nuan meri sida seput, sida idup.
    Nuan meri pengidup ti baru ngagai dunya.

    Saut: Puji meh TUHAN, O semengat aku!

    Bacha Ke Dua: Kereja Rasul 10: 34 - 38

    Peter lalu belabuh bejaku ngagai sida: “Aku nemu Allah Taala endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.

    Kita nemu pesan ti dikirumka Iya ngagai orang Israel, ti ngajar pemaik ulih Jesus Kristus, ke nyadi Tuhan ke semua mensia.

    Pesan nya udah ngelekai di serata menua Judea, berengkah ari Galili, udah bekau John ke madahka pasal baptisa, pasal Allah Taala ke nata Jesus orang Nasaret ngena Roh Kudus enggau kuasa, pasal Jesus ke bejalai ngagai mayuh bengkah endur ngereja pengawa ti manah, lalu ngeraika semua orang ke dirasuk antu, laban Allah Taala bisi enggau Iya.

    Tauka: Titus 2: 11 - 14; 3: 4 - 7

    Anak ti dikerinduka aku:
    Laban pengasih Allah Taala udah pegari, mai pengelepas ngagai semua mensia, ngajar kitai muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Allah Taala dalam dunya tu, sekumbang kitai ke nganti pengadang ti beberekat, enggau mulia Allah Taala, enggau Jesus Kristus ti Juruselamat kitai, pegari ke udah nyerahka Diri ketegal kitai, ngambika Iya ulih nebus kitai ari semua penyai, lalu nuchi kitai ngambika kitai diempu Iya siku aja, lalu gagit ati ngereja pengawa ti badas.

    Tang lebuh pemadas, penelap enggau pengerindu Allah Taala ti nyadi Juruselamat kitai pegari, Iya nyelamatka kitai, ukai laban kitai udah ngereja pengawa ti lurus, tang ulih pengasih Iya. Iya nyelamatka kitai ulih Roh Kudus, ke masu kitai, lalu ngadaka kitai baru, lalu meri kitai pengidup ti baru.

    Roh Kudus nya dituang Allah Taala ngagai kitai belimpah-limpah, ulih Jesus Kristus ti Juruselamat kitai,

    ngambika kitai digaga lurus ulih pengasih Allah Taala, lalu bempu pengidup ti meruan belama iya ti disadang kitai.

    Alleluia (peda Mark 9: 7)
    Alleluia, alleluia
    Lagit tebuka lalu nyawa Apai bisi didinga bejaku:
    “Tu Anak ke dikesayauka Aku. Pendingka Iya!”
    Alleluia.

    Tauka:

    Alleluia (peda Luke 3: 16)
    Alleluia, alleluia
    John bejaku: Siku orang ke bekuasa agi ari aku deka datai.
    Iya deka maptisa kita ngena Roh Kudus enggau api.
    Alleluia.

    Bacha Injil: Luke 3: 15 - 16, 21 - 22

    Orang mayuh lalu belabuh andal ati, lalu betanya dalam ati diri pasal John, ngumbai iya Kristus.

    John lalu nyaut semua sida, “Aku maptisa kita ngena ai, tang siku orang ke bekuasa agi ari aku deka datai. Indah muka tali selipar Iya deh aku enda tau. Iya deka maptisa kita ngena Roh Kudus enggau api.”

    Lebuh semua orang udah dibaptisa magang, lalu Jesus udah mega dibaptisa lalu besampi, langit lalu tebuka, lalu Roh Kudus nurun atas Iya baka burung achang.

    Munyi nyawa lalu bejaku ari serega, “Nuan tu Anak ke dikesayauka Aku. Aku rinduka Nuan.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads