Motosikal belantak enggau lori: Dua lelaki bebadi nyawa
Cari Berita

Advertisement

Motosikal belantak enggau lori: Dua lelaki bebadi nyawa

Chief Editor | Berita Iban MY
January 26, 2019

KASIH AMAI: Pendiau ba palan eksiden ke nyadi.

MIRI: Dua lelaki bebadi nyawa pengudah motosikal ke ditepan seduai iya belantak enggau sebuah lori treler di KM118, Miri-Bintulu, lemai kemari.

Dua 'mansa', Amir Lau, 17, enggau Jeckson Fahik Guteres, 17, diripotka ngapuska seput kepenudi ba palan eksiden ke nyadi ketegal balat bakal.

Ketuai Opis Tasat enggau Penguasa Trafik Sarawak, Supt Alexson Naga Chabu, madahka sebedau eksiden nyadi, seduai dua 'mansa' dipechaya benung dirantau jalai ari Niah nuju ke Bintulu.

Ku iya, lebuh datai ba palan eksiden ke nyadi, motosikal ke ditepan seduai iya enda mukai-mukai tama ke jalai ngelaban arus lalu ngejung ke belantak enggau lori.

“Dempa pemalat 'impak' eksiden nya, seduai dua tepelanting ari motosikal sereta balat bakal.

“Raban perubat ke bisi datai ba palan eksiden ke nyadi madahka 'mansa' udah enda ulih diselamatka agi tauka udah nadai,” ku iya lebuh ke dirandau pengarang berita sehari tu tadi.

Ba palan eksiden ke nyadi.

Alexson ngelansa, deriba lori, 47, diripotka selamat tauka nadai bakal.

Ku iya, bangkai seduai dua udah dianjung ke Sepital Miri kena bejalaika pengawa buntas tasat.

“Kes tu dipansik ari baruh 'Seksyen 41 (1) Akta Pengangkutan Jalan 1987',” tandu iya.