Header Ads

  • Baru Nyadi

    11 February 2019 - Hari Satu ba Minggu Kelima Musim Selama

    Sida lalu berumban nesau orang mayuh di serata menua nya, lalu bebaika orang ke sakit ngena peninduk sida ngagai sebarang endur alai sida ninga Jesus bisi.


    11 February 2019 - Hari Satu ba Minggu Kelima Musim Selama

    Bacha Ke Satu: Pemungkal 1: 1 - 19

    Ba pun iya kelia, lebuh Allah Taala berengkah ngaga langit enggau dunya, dunya endang apin bisi bakal tauka gamal sereta nadai utai nguan. Semina ribut ti deras ari Allah Taala aja ti bepuput atas tasik ti agi petang.

    Allah Taala lalu bejaku, “Awakka penampak pegari.” Penampak lalu pegari.
    Allah Taala meda penampak nya manah; lalu Iya nyeraraka penampak nya ari pemetang.

    Iya ngumbai penampak nya “Siang” lalu pemetang nya dikumbai Iya “Malam.” Lemai abis lalu pagi pen datai. Nya hari ti keterubah.

    Lalu ku Allah Taala bejaku, “Awakka kebung pegari kena nyeraraka ai ti di atas ari ai ti di baruh.”

    Nya alai Allah Taala ngaga kebung nya lalu nyeraraka ai ti di baruh kebung nya ari ai ti ari atas kebung nya. Utai nya lalu nyadi.

    Iya ngumbai kebung nya “Langit.” Lemai abis lalu pagi pen datai. Nya hari ti kedua.

    Udah nya Allah Taala bejaku, “Awakka ai ti di baruh langit begelumu ba siti endur, ngambika tanah pegari.” Utai nya lalu nyadi.

    Iya ngumbai tanah “Darat,” lalu ai ti begelumu dikumbai Iya “Tasik.” Lalu Allah Taala meda utai nya manah.

    Udah nya Iya bejaku, “Awakka tanah mansutka semua macham utai ti tumbuh: utai ti mansutka leka, enggau semua macham kayu ti mansutka buah ti bisi leka.” Utai nya lalu nyadi.

    Nya alai, tanah mansutka semua macham utai ti tumbuh, lalu Allah Taala meda utai nya manah.

    Lemai abis lalu pagi pen datai. Nya hari ti ketiga.

    Udah nya Allah Taala bejaku, “Awakka mayuh macham penampak pegari di langit, kena nyeraraka siang ari malam, enggau kena nunjukka maya hari, taun enggau maya gawai belabuh.

    Sida deka manchar di langit lalu meri penampak ngagai dunya.” Utai nya lalu nyadi.

    Nya alai Allah Taala ngaga dua igi penampak ti besai, iya nya mata hari ti bekuasa lebuh siang hari, enggau bulan ti bekuasa lebuh malam hari. Iya mega ngaga bintang.

    Iya ngengkahka semua penampak nya di langit, ngambika sida manchar ngagai dunya, bekuasa lebuh siang enggau lebuh malam hari, sereta nyeraraka penampak ari pemetang. Lalu Allah Taala meda utai nya manah.

    Lemai abis lalu pagi pen datai. Nya hari ti keempat.

    Masmur Entara: Masmur 104: 1 - 2A, 5 - 6, 10 & 12, 24 & 35C

    Saut (peda 31b): Awakka TUHAN gaga ati ke utai ti udah digaga Iya!

    Ke Satu
    O TUHAN Allah Taala aku,
    naka meh pemesai kuasa Nuan!
    Nuan ngerasukka mulia raja.
    Nuan nyerayung Diri ngena penampak.

    Saut: Awakka TUHAN gaga ati ke utai ti udah digaga Iya!

    Ke Dua
    Nuan udah ngengkahka dunya tegap ba pugu iya,
    lalu iya enda dikinsitka.
    Nuan udah ngengkahka tasik ba atas pugu dunya baka baju panjai,
    lalu ai ngelamun bukit.

    SautAwakka TUHAN gaga ati ke utai ti udah digaga Iya!

    Ke Tiga
    Nuan ngasuh mata ai mansutka ai ba lebak,
    lalu sungai rarat ba entara bukit.
    Ba kayu ti semak nya,
    burung ngaga sarang lalu belagu.

    SautAwakka TUHAN gaga ati ke utai ti udah digaga Iya!

    Ke Empat
    TUHAN, Nuan udah ngaga mayuh macham utai!
    Naka meh pemintar Nuan ngaga semua utai nya!
    Dunya nyau penuh laban utai ti idup ti digaga Nuan.
    Puji meh TUHAN, O semengat aku! Puji meh TUHAN!

    Saut: Awakka TUHAN gaga ati ke utai ti udah digaga Iya!

    Alleluia / Aklamasi sebedau Injil (peda Matthew 4: 23)

    Alleluia, alleluia
    Jesus ngajar Berita Manah pasal Perintah Allah Taala,
    sereta ngeraika orang ke kena laban semua macham penyakit enggau pemedis.
    Alleluia.

    Bacha Injil: Mark 6: 53 - 56

    Lebuh sida udah ngelayang ke seberai, sida lalu sangkai di Genesaret, lalu nanchangka perau sida.

    Lebuh sida angkat ari perau, orang mayuh lalu tekala nya ngelala Jesus.

    Sida lalu berumban nesau orang mayuh di serata menua nya, lalu bebaika orang ke sakit ngena peninduk sida ngagai sebarang endur alai sida ninga Jesus bisi.

    Lalu di sebarang endur ti digagai Jesus, nemuka genturung pendiau, nengeri, tauka di umai, sida ngalika orang ke sakit ba sebelah pasar, lalu minta Iya nejuka sida ke sakit negu puting serayung Iya, lalu semua orang ke negu serayung Iya gerai magang.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads