Header Ads

  • Baru Nyadi

    12 February 2019 - Hari Dua ba Minggu Kelima Musim Selama

    Lebuh orang Parisi enggau sekeda pengajar Adat ke datai ari Jerusalem begelumu ngelingi Iya, sida meda sekeda murid Jesus makai ngena jari ti enda tuchi, reti nya, enda dibasu.

    12 February 2019 - Hari Dua ba Minggu Kelima Musim Selama

    Bacha Ke Satu: Pemungkal 1: 20 - 2: 4

    Udah nya Allah Taala bejaku, “Awakka ai penuh laban semua bansa utai ti idup, lalu awakka burung terebai di langit.”

    Nya alai Allah Taala ngaga jelu ti besai sereta nyelai di tasik, semua bansa utai ti idup dalam ai, enggau semua bansa burung. Lalu Allah Taala meda utai nya manah.

    Iya merekatka semua sida, lalu ngasuh utai ti idup dalam ai beranak betelesak, lalu ngemenuhka tasik. Iya mega ngasuh burung beranak betelesak di dunya.
    Lemai abis lalu pagi pen datai. Nya hari ti kelima.

    Udah nya Allah Taala bejaku, “Awakka dunya mansutka semua bansa jelu ti idup: jelu tupi, jelu babas, enggau jelu ti ngerayap.” Utai nya lalu nyadi.

    Nya alai Allah Taala ngaga semua bansa jelu, lalu Iya meda semua utai nya manah magang.

    Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah.”

    Nya alai Allah Taala ngaga mensia neladan gamal Iya Empu; Iya ngaga sida lelaki enggau indu.

    Allah Taala merekatka sida, lalu bejaku ngagai sida, 
    “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”

    Ku Allah Taala bejaku, “Aku meri kita semua macham leka utai enggau semua macham buah nyadika pemakai kita; lalu ke semua bansa jelu babas ti di dunya, enggau ke semua bansa burung, Aku meri sida rumput enggau utai ti bisi daun nyadika pemakai sida.” Utai nya lalu nyadi.

    Allah Taala meda semua utai ti udah digaga Iya manah magang. Lemai abis lalu pagi pen datai. Nya hari ti keenam.

    Nya alai langit enggau dunya, enggau semua utai ti dalam sida tembu magang digaga. 

    Ba hari ti ketujuh Allah Taala tembu ngereja semua pengawa Iya, lalu ngetu gawa.

    Iya merekatka hari ti ketujuh nya, lalu ngeletak hari nya kudus, laban ba hari nya Iya tembu ngaga semua utai ti digaga Iya, lalu Iya belelak lalu ngetu gawa.

    Nya meh jalai langit enggau dunya digaga.

    Masmur Entara: Masmur 8: 3 - 4, 5 - 6, 7 - 8

    Saut (peda 2ab): O TUHAN, ti Allah Taala kami. Naka meh pemesai kuasa nama Nuan di serata dunya!

    Ke Satu
    Lebuh aku engkadah ke langit ti udah digaga Nuan, 
    engkadah ngagai bulan enggau bintang ti udah di atur Nuan,
    aku lalu nanya: ‘Sapa mensia, alai Nuan deka bedulika sida? 
    Sapa anak mensia, alai Nuan deka ibuhka sida?’

    Saut: O TUHAN, ti Allah Taala kami. Naka meh pemesai kuasa nama Nuan di serata dunya!

    Ke Dua
    Tang taja pia, Nuan udah ngaga iya semina baruh mimit ari Nuan Empu, 
    lalu Nuan udah meri iya mulia enggau basa nyadika makota iya.
    Nuan udah ngasuh iya merintah semua utai ti digaga Nuan; 
    Nuan udah ngengkahka semua utai di baruh kaki.

    SautO TUHAN, ti Allah Taala kami. Naka meh pemesai kuasa nama Nuan di serata dunya!

    Ke Tiga
    Semua jelu bedus enggau sapi, 
    enggau jelu babas, 
    Semua burung enggau ikan 
    enggau semua utai ti idup dalam tasik.

    Saut: O TUHAN, ti Allah Taala kami. Naka meh pemesai kuasa nama Nuan di serata dunya!

    Alleluia / Aklamasi sebedau Injil (peda Masmur 119: 36, 29B)

    Alleluia, alleluia
    Asuh ati aku inginka adat Nuan, O Allah Taala;
    lalu ulih pengasih Nuan, ajar aku adat Nuan.
    Alleluia.

    Bacha Injil: Mark 7: 1 - 13

    Lebuh orang Parisi enggau sekeda pengajar Adat ke datai ari Jerusalem begelumu ngelingi Iya, sida meda sekeda murid Jesus makai ngena jari ti enda tuchi, reti nya, enda dibasu.

    (Laban orang Parisi, enggau semua orang Judah, enda makai enti sida apin masu jari sida nitihka ajar aki ini sida; lalu sida enda makai utai ti udah dibeli ari pasar, enti utai nya apin dibasu.Lalu sida mayuh adat asal ti bukai ti dititihka sida, baka bebasuka mangkuk, periuk enggau pekekas bukai ti digaga ari temaga.)

    Nya alai orang Parisi enggau sida pengajar Adat lalu nanya Iya, “Nama kebuah murid Nuan enda nitihka adat sida ke tuai, tang makai ngena jari ti enda tuchi?”

    Jesus lalu nyaut sida, “Betul jaku nabi Isaiah lebuh iya benabika pasal kita ke pura-pura ngapa tu, munyi ti udah ditulis: 

    ‘Orang tu ngemesaika Aku ngena mulut sida, tang ati sida jauh ari Aku.

    Sida ngelebuka diri nyembah Aku, laban sida meri ajar mensia lalu ngumbai nya adat Aku.’

    Kita ngelengkaka pesan Allah Taala, lalu bepegai ba ajar mensia.”

    Lalu ku Iya bejaku ngagai sida, “Kita pintar nulak pesan Allah Taala, ngambika kita nitihka ajar kita empu.

    Laban ku Moses, ‘Bebasaka apai enggau indai kita.’ Lalu iya mega nyebut, ‘Barang sapa bejai apai indai diri, enda tau enda dibunuh.’

    Tang ku kita, enti orang madah ngagai apai tauka indai iya, ‘Utai ti patut diberi aku ngagai nuan, udah diberi aku ngagai Allah Taala,’ iya enda ibuh ngereja sebarang utai ke apai tauka indai iya.

    Nya jalai kita muai jaku Allah Taala lalu nukar iya ngena ajar kita empu, ti diberi kita ngagai orang. Lalu kita ngereja mayuh utai bukai ti baka nya.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads