Header Ads

  • Baru Nyadi

    15 February 2019 - Hari Lima ba Minggu Kelima Musim Selama

    Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya.

    15 February 2019 - Hari Lima ba Minggu Kelima Musim Selama

    Bacha Ke Satu: Pemungkal 3: 1 - 8

    Nyadi ular nya jelu ti pintar agi ari semua jelu bukai ti udah digaga TUHAN Allah Taala. Ular nya lalu bejaku ngagai indu nya, “Kati amat Allah Taala enda nyagi seduai makai buah ari semua kayu ti dalam kebun tu?”

    Disaut indu nya, “Kami duai tau makai buah ari sebarang kayu dalam kebun tu, tang Allah Taala madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.”

    Tang ku ular nya nyaut indu nya, “Enda seduai mati, laban Allah Taala nemu, lebuh seduai makai buah nya, seduai deka nyadi sebaka enggau Allah Taala, nemu ngelala bida entara utai ti manah enggau utai ti jai.”

    Lebuh indu nya meda buah kayu nya manah ke pemakai sereta manah dipeda, lalu tau ngasuh pintar, iya lalu makai buah nya. Iya mega meri sekeda buah nya ngagai laki iya, ke bisi enggau iya, lalu laki iya mega makai buah nya.

    Lebuh seduai iya udah makai buah nya, mata seduai iya tebuka, lalu seduai iya nemu diri telanjai. Seduai iya lalu nyait daun kayu ara, kena seduai iya mampul tubuh diri.

    Lemai nya seduai iya ninga TUHAN Allah Taala bejalai dalam kebun. Seduai iya lalu belalai ari TUHAN Allah Taala ba sebelah madang kayu dalam kebun nya.

    Masmur Entara: Masmur 32: 1 - 2, 5, 6, 7

    Saut (peda 1): Beberekat meh orang lebuh dosa enggau penyalah sida diampun.

    Ke Satu
    Beberekat meh orang lebuh dosa enggau penyalah sida diampun.
    Beberekat meh orang ke enda dikumbai TUHAN bisi penyalah 
    lalu enda nipu orang.

    SautBeberekat meh orang lebuh dosa enggau penyalah sida diampun.

    Ke Dua
    Udah nya aku ngaku dosa aku ngagai Nuan, 
    lalu aku enda ngelalaika penyalah diri. 
    Aku ngaku utai nya ngagai Nuan, 
    lalu Nuan ngampun semua dosa aku.

    SautBeberekat meh orang lebuh dosa enggau penyalah sida diampun.

    Ke Tiga
    Nya alai semua nembiak Nuan ke taluk ngagai Nuan 
    patut besampi ngagai Nuan lebuh sida dituntung penusah 
    ngambika penusah nya enda datai ba sida.

    SautBeberekat meh orang lebuh dosa enggau penyalah sida diampun.

    Ke Empat
    Nuan nyadi endur alai aku belalai. 
    Nuan deka ngelepaska aku ari penusah. 
    Aku belagu enggau nyawa ti inggar muji pengelepas ti datai ari Nuan, 
    laban Nuan nyaga aku.

    SautBeberekat meh orang lebuh dosa enggau penyalah sida diampun.

    Alleluia / Aklamasi sebedau Injil (peda Kereja Rasul 16: 14B)

    Alleluia, alleluia
    Buka ati kami O TUHAN,
    ngambika mendingka jaku Anak Nuan.
    Alleluia.

    Bacha Injil: Mark 7: 31 - 37

    Udah nya Jesus mulaika Diri ari menua Tire, lalu bejalai nengah menua Sidon mansang ngagai Danau Galili, ngerenchah menua Sepuluh Buah Nengeri.

    Orang lalu mai ngagai Iya siku lelaki ke bengal sereta bisu; sida lalu minta Jesus ngengkahka jari Iya atas orang nya.

    Jesus lalu mai orang nya ke tisi, ngejang ari bala mayuh. Iya ngachukka tunjuk Iya ngagai lubang pending orang nya, ngeludah dilah iya lalu negu dilah iya nya, engkadah ke langit, meresu ngesuhka seput, lalu bejaku ngagai orang nya, “Epata,” reti nya, “Tebuka meh!”

    Tekala nya orang nya lalu ulih ninga, dilah iya ulih engkebut, lalu iya ulih bejaku enggau terang.

    Jesus lalu enda nyagi sida nusui pasal nya ngagai orang. Tang makin balat Iya enda nyagi sida, makin balat agi ga sida nusui utai nya.

    Sida balat amat alit ati. Ku sida, “Semua utai ti dikereja Iya manah magang! Iya ngasuh orang ke bengal ulih ninga, lalu ngasuh orang ke bisu ulih bejaku!”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads