Header Ads

  • Baru Nyadi

    2 anak mit, 10 enggau 11 taun mujur ditangkap polis, enchuri ba restoran

    Seduai dua (saspek) mujur ditangkap polis ba palan kes ke nyadi.

    SIBU: Dua anak mit beumur 11 enggau 10 taun ditangkap lebuh tama belalai enggau enchuri ba sebuah restoran, di Sibu, pagi kemari.

    Seduai iya (saspek) dipechayaka sembilan kali udah tama belalai tauka enchuri ba restoran enggau kedai ba pelilih pasar Sibu.

    Seduai iya diatu direman pengelam empat hari, belabuh hari kemari.

    Ketuai Polis Pampang Sibu, Asisten Komisioner, Stanley Jonathan Ringgit, madahka kes nyadi urung jam 1 pagi nya, seduai ya ditangkap pengudah ulah seduai iya dipeda siku sekuriti ke gawa sebuah bank, semak endur palan kes ke nyadi.

    “Orang ke ngempu (tauke) restoran nerima talipaun ari sekuriti ke gawa ba sebuah bank ti enda jauh ari restoran nya enggau madahka restoran iya bisi orang tama.

    “Berindik ari nya, tauke nya berumban ngesah ke restoran enggau tepedaka pintu kedai ‘roller shutter’ bisi tebuka mimit. Iya lalu ngaga ripot ngagai polis tekala nya,” ku iya lebuh ke dirandau pengarang berita sehari tu tadi.

    Ku iya, asil peresa tumu, jemari ba dalam restoran nya benung temera. Kelimpah ari nya, bisi beberapa iti perengka diripotka lenyau ianya duit seling penyampau RM300 enggau siti iPad. 

    “Asil pansik silik, sekeda perengka udah tembu dibungkus dalam pesetik, tang enda ulih ditabanka seduai iya. Perengka ke dalam pesetik nya ianya ai dalam tin enggau pemakai kering (risin),” ku iya.

    Stanley ngelansa, raban polis mujur nangkap seduai iya ke benung belalai ba dalam sebuah bilik fail enggau dibaie ke Balai Polis Sibu kena bejalaika pengawa silik agi.

    Kes nya dipansik ari baruh "Seksyen 457 Kanun Keseksaan" ketegal tama belalai ba restoran enggau enchuri reta tengkira.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads