Header Ads

  • Baru Nyadi

    23 February 2019 - Hari Enam ba Minggu Ke-enam Musim Selama

    Sida lalu meda gamal Iya berubah, lalu gari Iya bebali beperenching burak, burak agi ari ti ulih dibasu mensia di dunya tu.

    23 February 2019 - Hari Enam ba Minggu Ke-enam Musim Selama (Memorial of Saint Polycarp, Bishop and Martyr)

    Bacha Ke Satu: Hebrew 11: 1 - 7

    Menyadi:
    Reti pengarap nya arapka utai ti disadang, arapka utai ti enda dipeda.

    Sida ke dulu kelia dikerinduka Allah Taala, ulih pengarap.

    Ulih pengarap, kitai nemu langit enggau dunya digaga ulih jaku Allah Taala, ngambika utai ti dipeda, digaga ari utai ti enda dipeda. Ulih pengarap, Abel ngenjuk piring ti lebih agi dikerinduka Allah Taala ari piring ti diberi Kain. 

    Ulih pengarap, Abel dikumbai Allah Taala lurus, laban Allah Taala rinduka pemeri iya. Abel mati, tang ulih pengarap iya, iya agi mengkang bejaku diatu.

    Ulih pengarap, Enok dibai ke atas ngambika iya enda mati, lalu nadai orang nemu endur alai iya, laban Allah Taala udah nabanka iya. Tang sebedau iya ditabanka, iya udah ngerinduka ati Allah Taala.

    Nadai orang ulih ngerinduka ati Allah Taala enti iya enda arapka Allah Taala, laban barang sapa datai ngagai Allah Taala enda tau enda arapka Allah Taala endang amat bisi, lalu arapka Iya deka ngupah orang ke ngiga Iya.

    Ulih pengarap, Noah, lebuh iya diberi Allah Taala jaku tangkan pasal utai ti deka nyadi, ngasi lalu ngaga sebuah bandung kena iya ngidupka sida sebilik. Nya meh jalai orang di dunya tu diukum, lalu Noah nerima ari Allah Taala pengelurus ti datai ulih pengarap.

    Masmur Entara: Masmur 145: 2 - 3, 4 - 5, 10 - 11

    Saut (peda 1): Aku deka muji nama Nuan belama-lama iya TUHAN.

    Ke Satu
    Tiap hari aku deka meri terima kasih ngagai Nuan, 
    lalu muji nama Nuan belama lama iya.
    TUHAN endang besai lalu endang patut dipuji. 
    Pemesai kuasa Iya enda ulih diperagam mensia.

    SautAku deka muji nama Nuan belama-lama iya TUHAN.

    Ke Dua
    Utai ti udah dikereja Nuan deka dipuji genap turun-menurun. 
    Sida deka madahka pasal pemesai pengawa Nuan.
    Sida deka bejakuka pasal mulia enggau pemesai kuasa Nuan, 
    lalu aku deka belematika pemadas pengawa Nuan.

    SautAku deka muji nama Nuan belama-lama iya TUHAN.

    Ke Tiga
    Semua utai ti idup ti udah digaga Nuan, O TUHAN, 
    deka meri terima kasih ngagai Nuan, 
    lalu semua nembiak Nuan deka muji Nuan.
    Sida deka bejakuka pasal mulia diraja Nuan 
    lalu madahka pasal kuasa Nuan.

    SautAku deka muji nama Nuan belama-lama iya TUHAN.

    Alleluia / Aklamasi sebedau Injil (peda Mark 9: 7)

    Alleluia, alleluia
    Serega tebuka, lalu nyawa Apai didinga bejaku:
    Tu Anak ke dikesayauka Aku. Pendingka Iya!
    Alleluia.

    Bacha Injil: Mark 9: 2 - 13

    Enam hari udah bekau nya Jesus mai Peter, James enggau John, lalu nguluka sida niki ngagai bukit sigi ti tinggi, kediri sida aja.

    Sida lalu meda gamal Iya berubah, lalu gari Iya bebali beperenching burak, burak agi ari ti ulih dibasu mensia di dunya tu.

    Sida lalu tepedaka Elijah seduai Moses lalu pegari lalu bejaku enggau Jesus.

    Peter lalu bejaku ngagai Jesus, “Pengajar, manah kitai diau ditu! Awakka kami ngaga tiga buah langkau, sebuah ke Nuan, sebuah ke Moses, lalu sebuah ke Elijah.”

    Peter enda nemu utai ti patut disebut iya, laban sida balat takut.

    Siti remang lalu ngelindung sida, lalu nyawa bisi didinga bejaku ari dalam remang nya, “Tu Anak ke dikesayauka Aku. Pendingka Iya!”

    Sida lalu malik kiba kanan, tang sida nadai meda orang bukai, semina Jesus aja.

    Lebuh sida nurun ari bukit nya, Jesus lalu enda nyagi sida madah ngagai orang utai ti udah dipeda sida, nyentuk ngagai maya Anak Mensia udah angkat ari mati.

    Nya alai sida nadai madahka pekara nya ngagai orang, lalu betanyaka reti utai ti dikumbai pengangkat ari mati.

    Sida lalu nanya Iya, “Nama kebuah sida pengajar Adat madahka Elijah enda tau enda datai dulu?”

    Ku Iya bejaku ngagai sida, “Elijah endang amat dulu datai lalu nyendiaka semua utai. Tang nama kebuah Bup Kudus madahka Anak Mensia deka balat diperinsa, lalu dikeleseka?. Tang Aku madah ngagai kita, Elijah endang udah datai, lalu sida udah ngereja utai ngagai iya nitihka peneka ati sida, munyi ti udah ditulis pasal iya.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads