26 February 2019 - Hari Dua ba Minggu Ketujuh Musim Selama - Berita Iban Online | Laman Web Berita Kitai

Header Ads

  • Baru Nyadi

    26 February 2019 - Hari Dua ba Minggu Ketujuh Musim Selama

    Ku Iya bejaku ngagai sida, “Anak Mensia deka diserahka ngagai jari mensia, lalu sida deka munuh Iya, lalu tiga hari udah bekau nya, Iya deka angkat idup baru.”

    Bacha Ke Satu: Sirak 2: 1 - 11

    Anak aku, enti nuan deka gawaka Tuhan, nuan anang enda nyediaka diri diuji sebarang maya.

    Tetap sereta teguhka ati nuan; anang irau lebuh penusah datai. Nuan anang enda tetap talukka Tuhan, lalu anang limpang ari Iya, nya baru nuan senang lantang jemah ila.

    Terima aja nama utai ti nyadi ba nuan, lalu liat ati, sekalika nuan dikeleseka, laban mas diuji dalam api, lalu orang ke dikerinduka Tuhan deka dikeleseka orang kena nguji iya.

    Arap ke Tuhan, nya baru Iya nulung nuan. Ruruska jalai pengidup nuan lalu andal ke Iya.

    Semua kita ke nangika Tuhan, anti aja meh pengasih Iya. Anang sekali-kali limpang ari Iya enggaika kita labuh. Semua kita ke nangika Tuhan, arap ke Iya. Kita tetap deka bulih upah.

    Semua kita ke nangika Tuhan, andal ke pengelantang, pengasih, enggau pengaga ti tetap enggi kita belama.

    Ingatka orang rebak ke dulu lalu peratika pekara tu: kati kala Tuhan ngelebu orang ke andal ke Iya? Kati kala Tuhan ninggalka orang ke bebasaka Iya? Kati kala Tuhan enda pedulika orang ke besembiang ngagai Iya? Tuhan sigi mentas sereta penuh pengasih. Iya ngampun penyalah kitai lalu nyelamatka kitai ari penusah.

    Masmur Entara: Masmur 37: 3 - 4, 18 - 19, 27 - 28A, 39 - 40

    Saut (peda 5): Serahka pengidup nuan ngagai TUHAN, lalu Iya deka nulung nuan.

    Ke Satu
    Panggaika pengarap kita ba TUHAN, lalu kereja utai ti badas; 
    nya baru kita deka diau di menua tu, lantang sereta likun.
    Gaga ati ke TUHAN, 
    lalu Iya deka meri nuan utai ti dikinginka nuan.

    Saut: Serahka pengidup nuan ngagai TUHAN, lalu Iya deka nulung nuan.

    Ke Dua
    TUHAN nyaga orang ke nadai penyalah, 
    lalu sida deka bempu menua tu belama iya.
    Sida enda merinsa lebuh maya ti jai, 
    lalu lebuh lapar pungkang nyadi, sida deka mayuh pemakai.

    SautSerahka pengidup nuan ngagai TUHAN, lalu Iya deka nulung nuan.

    Ke Tiga
    Lengkaka penyai, lalu kereja pemadas; 
    ngambika kita diau di menua tu belama iya,
    laban TUHAN rinduka atur ti lurus; 
    Iya enda ninggalka bala nembiak Iya ke tetap ati ngagai Iya. 

    SautSerahka pengidup nuan ngagai TUHAN, lalu Iya deka nulung nuan.

    Ke Empat
    TUHAN ngelepaska orang ke lurus 
    lalu nyaga sida lebuh penusah nyadi.
    TUHAN nulung sida, lalu ngelepaska sida. 
    Iya ngelepaska sida ari orang ke jai, lalu nyelamatka sida, 
    laban sida belindung ba Iya.

    SautSerahka pengidup nuan ngagai TUHAN, lalu Iya deka nulung nuan.

    Alleluia / Aklamasi sebedau Injil (peda Galatia 6: 14)

    Alleluia, alleluia
    Awakka aku semina temegahka regang Jesus Kristus Tuhan kitai, 
    ti udah dikena ngeregang dunya ke aku, lalu aku diregang ke dunya.
    Alleluia.

    Bacha Injil: Mark 9: 30 - 37

    Sida lalu mupuk ari endur nya, lalu bejalai nengah menua Galili.

    Jesus enggai ngasuh orang nemu endur alai Iya, laban Iya benung ngajar murid Iya. 

    Ku Iya bejaku ngagai sida, “Anak Mensia deka diserahka ngagai jari mensia, lalu sida deka munuh Iya, lalu tiga hari udah bekau nya, Iya deka angkat idup baru.”

    Tang sida enda meretika utai ti ku Iya, lalu sida takut nanya Iya.

    Udah nya sida datai di Kapernaum. 

    Lebuh Iya udah datai di rumah, Iya lalu nanya sida, “Nama utai ti dikelikuhka kita di rantau jalai tadi?”

    Tang sida enda bemunyi, laban lebuh sida di rantau jalai, sida udah bekelikuhka enggau pangan diri sapa ke pemadu besai.

    Jesus duduk, lalu ngangauka sida dua belas, lalu bejaku ngagai sida, “Barang sapa keran deka nyadi dulu, enda tau enda nyadi dudi ari semua, lalu nyadi pemela ke semua.”

    Iya lalu ngambi siku anak mit, lalu ngengkahka anak mit nya ba tengah-tengah sida.

    Iya merap anak mit nya, lalu bejaku ngagai sida, “Barang sapa nerima siku anak mit ti baka tu dalam nama Aku, nerima Aku. Lalu barang sapa nerima Aku, ukai nerima Aku, tang nerima Iya ke ngirumka Aku.”

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads