CUEPACS Sarawak nyukung polisi jam kereja fleksi ke dibantaika Opis Pengawa Perintah - Berita Iban Online | Laman Web Berita Kitai

Header Ads

  • Baru Nyadi

    CUEPACS Sarawak nyukung polisi jam kereja fleksi ke dibantaika Opis Pengawa Perintah

    Chairman Cuepacs Sarawak, Ahmad Malie.

    KUCHING: Kongres Gerempung Pengereja Pengawa Opis Perintah (CUEPACS) Sarawak nyukung penuh polisi jam kereja fleksi ke dibantaika Opis Pengawa Perintah (JPA) ti berengkah dikena 1 Mac tu (Hari Lima) dikena ngenegap agi jam kereja fleksi berenggat ke diguna kenyau ari taun 1988.

    Chairman Cuepacs Sarawak, Ahmad Malie, madahka ari sukut perati polisi jam fleksi tu lebih fleksibel sereta ngemuntang ke raban pengereja pengawa perintah kelimpah ari nyeliahka sida berumban nurun gawa nyema bisi pekara enda disadang maya ba rumah.

    "Ambika chunto sida nadai agi tusut runding ngerumban jalai sekut ketegal penusah bebadi laban jam sida laun datai ba opis deka diganti enggau jam pulai laun.

    "Enggau jaku puntang sida ke masuk kereja pukul 8.10 pagi tau mulaika diri pukul 5.10 lemai dibanding enggau semina dirikod datai laun ba polisi sebedau tu.

    "Nya endang udah nyadi tanggungpengawa CUEPACS Sarawak nyukung polisi ti chukup manah tu ke pemaik orang ke gawa perintah," ku iya.

    "Taja pia, aku ngarapka bisi tusun atur ke silik bakani nguna atur baru tu awak ulih meri pangka ke manah ngagai sebarang ejensi enggau opis perintah ti ngemeranka polisi kereja fleksi," ku Ahmad.

    Tambah mega, penerang ke silik mega beguna awakka piak ketuai ba genap opis mereti sereta enda saru penemu bekaul enggau polisi baru tu.

    Nangkan kenya, Ahmad mega ngarapka nengah polisi baru raban pengereja pengawa perintah deka ransing agi ngereja pengawa enggau penuh pengelantang sereta meri servis ke pemadu manah ngagai mensia mayuh.

    Ungkup penemu, kena 27 Febuari tu tadi sebengkah 'portal' dalam menua mantaika penerang ari Ketuai Direktor JPA, Datuk Seri Borhan Dolah, madahka sentang polisi kereja fleksibel ba serata menua ngambika meri pengelantang ngagai pengereja pengawa lebih agi sida ke udah bisi ruang bilik.

    Ba penerang nya, madah jam gawa fleksibel dibantai ungkup Kuala Lumpur enggau Putra Jaya sereta semua opis perintah besai ba Perlis, Perak, Selangor, Johor, Terengganu, Sabah enggau Sarawak.

    "Projek pemungkal nya ngemeranka jam gawa ke 'fleksibel', iya nya pengereja pengawa ulih datai enggau pulai nitihka pengelantang diri, asal jam penuh gawa sepanjai hari.

    “Kami ngepunka projek pemungkal tu ba beberapa itu opis perintah dulu lalu beratika timbal (respon) ari orang mayuh sebedau dikerembaika ngagai ejensi opis perintah kebukai,” ku tandu Borhan ba penerang nya.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads