Dato Andrew Wong Kee Yew ditemu midang ba bilik peninduk iya - Berita Iban Online

Header Ads

  • Baru Nyadi

    Dato Andrew Wong Kee Yew ditemu midang ba bilik peninduk iya

    Dato Andrew Wong Kee Yew

    SIBU: Ex-chalun Barisan Nasional (BN) Pengawa Bepilih Besai Ke-14 (PRU14) Dato Andrew Wong Kee Yew ditemu midang ba bilik peninduk iya di Jalai Ipoh, malam Hari Minggu.

    Apai niang, Menteri Wang II Dato Sri Wong Soon Koh madah, urung jam 7 pagi Hari Minggu, niang enggau raban 4x4 bejalai ngagai Rumah Uka, Tutus, Batang Igan.

    "Ngelawa rumah panjai nya iya enggau bala iya ngena 'jet ski' urung sejam.

    "Iya begulai manah enggau peranak rumah panjai maya nya," pia ku iya maya berandau enggau media ba rumah iya di Jalai Ipoh ditu, sehari tu.

    Soon Koh madah, lebuh niang datai ba rumah endang sigi udah lemai lalu tama belelak ba bilik peninduk.

    Nangkan ke nya, ku iya, indai niang Datin Sri Pauline Leong ngangauka niang nurun makai tang enda nyaut.

    "Urung jam 9 malam, indai niang nengkuk pintu nguji ngangau niang tang nadai ditimbal iya.

    "Udah nya indai niang tama ke bilik peninduk lalu meda niang gali ba tail," ku iya.

    Nangkan ke nya, Soon koh madah, sida betelefon ngagai sepital pribit lalu niang diripotka udah ngapuska seput kepenudi urung jam 11 malam.

    Niang, 44,  mega ex-Sapit Chairman Opis Kaunsil Sibu (SMC) anak tunggal Soon Koh enggau Pauline.

    Niang ninggalka dua iku anak enggau bini.

    Ba pekara bekaul, Ketuai Polis Sibu ACP Stanley Jonathan Ringgit madahka kes tu agi mengkang ditasat.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads