Header Ads

  • Baru Nyadi

    Kerita SUV ngelantak van ambulan ti mai siku indu betubuh bisi di Jalai Tun Ahmad Zaidi Adruce

    KASIH AMAI: Puji Tuhan laban nadai penusah bebadi nyawa diripotka ba palan eksiden ke nyadi.

    KUCHING: Sebuah kerita SUV ngelantak ambulan ti mai siku indu betubuh bisi ba simpang lampu tanda di Jalai Tun Ahmad Zaidi Adruce, pagi tu tadi. 

    Eksiden nyadi urung jam 9.30 pagi tadi, ambulan benung bejalai lurus ari Jalai Tun Ahmad Zaidi Adruce nuju ke HUS. Lebuh datai ba lampu tanda, enda mukai-mukai sebuah kerita SUV ke datai ari Jalai Green lalu ngelantak ambulan nya ari sepiak kiba lalu ngejung ke van ambulan nya rebah singat ba palan eksiden ke nyadi.

    Nitihka penerang ke diterima Berita Iban Online (BIO), indu ke betubuh bisi nya udah ditamaka ba wad beranak diripotka nadai nenama (stabil). Taja pia, siku agi 'mansa', 40 taun, penatai ari Kampung Nakong, Samarahan dianjung peresa ke HUS ari Klinik Kota Samarahan ketegal gula ba dalam darah iya tinggi.

    Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka 'mansa' bakal ba pala tang pemedis ba endur bukai apin temu. 

    "Berindik ari eksiden ke sama, siku indu nurse diripotka bakal ba kuyu sepiak kiba tang deriba van ambulan nya nadai bakal.

    "Indu ke betubuh bisi (pesakit) ke dalam ambulan nya agi diperubatka ba Unit Emergency Sepital Besai Sarawak," ku iya lebuh ke dirandau pengarang berita, sehari tu tadi.

    "Kes nya dipansik ari baruh 'Seksyen 43(1) Akta Pengangkutan Jalan 1987'," tandu iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads