Rega buah kelapa sawit di Sarawak diatu udah berinsur manah - Berita Iban Online | Laman Web Berita Kitai

Header Ads

  • Baru Nyadi

    Rega buah kelapa sawit di Sarawak diatu udah berinsur manah

    Benung nikau ke leka larah buah sawit ke dalam lori.

    SIMUNJAN: Rega buah kelapa sawit di Sarawak diatu udah berinsur manah enggau komoditi nya udah belabuh meri asil ngagai orang ke bisi ladang sawit ba mengeri tu. 

    Nitihka penerang ari Lembaga Minyak Sawit Malaysia (MPOB), rega buah kelapa sawit ba pintu kilang di negeri tu kena Febuari 15 ianya Gred A, nyauka datai RM420 setan, Gred B (RM401 setan) enggau Gred C (RM382 setan).

    Enti dibandingka ba November 28, 2018, rega buah kelapa sawit ba pintu kilang di negeri tu ba rega ke pemadu mit ianya Gred A, semina RM343 setan, Gred B (RM328 setan) enggau Gred C (RM312 setan).

    Kelimpah ari nya, orang ke bisi kebun kecil sawit, Danieus Ibay, 27, ari Simunjan, madahka naka kediatu rega buah sawit nya bisi dipandangka di Simpang Gedong/Serian enggau Simpang Salcra Balai Ringin ke nyadi palan endur peranak Simunjan meresa rega buah sawit taja pan bisi bida enggau rega MPOB.

    “Taun nyin kemari, rega buah kelapa sawit nurun, Gred A, urung penyampau RM305 setan, lebuh aku ngual ba kilang di di Balai Ringin. Taun tu, rega bisi niki mimitenggau diatu udah niki ngagai RM350 setan, lebuh aku nganjung ba kilang ke sama,” ku iya ti bisi lesen nyual buah kelapa sawit ari MPOB.

    Ku iya, rega buah kelapa sawit Gred A, RM350 setan nya semina ulih meri asil ti manah agi urung penyampau RM3,000 nyentuk ke RM4,000 sebulan, asil ari ngaga kebun kelapa sawit pemesai 40 ekar di Simunjan, diatu.

    Nangkan ke nya, Danieus minta perintah seruran meresa rega buah kelapa sawit ngambika enda nurun baka ke udah ketegal rega komoditi nya tinggi mega ulih muka pengawa puang ngagai bala ke diau ba menua pesisir enggau orang ke kurang penatai pemisi ba luar bandar.

    Berindik ari rega buah kelapa sawit niki ba kilang, iya udah mutus ati deka meli kerita Hilux ngambika ulih kena ngangkut kediri asil buah sawit ari kebun iya ke kilang meroses buah nya di Balai Ringin ninting hari, belabuh ari taun tu.

    Ku iya, iya meli Hilux nya ngeloan ari bank enggau bayar bulan RM1,300 sebulan. Iya melabaka 'loan' nya ulih tumu ambis ari timpuh ke dituku enti nyema rega buah kelapa sawit majak niki.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads