Siku orang tuai diripotka lenyau pengudah pansut ari rumah
Cari Berita

Advertisement

Siku orang tuai diripotka lenyau pengudah pansut ari rumah

Chief Editor | Berita Iban MY
February 10, 2019

BA PALAN PENUSAH KE NYADI: Raban SAR benung berandau bakani chara deka ngiga orang tuai ke lenyau nya.

KUCHING: Siku orang tuai diripotka lenyau pengudah iya nurun ke tanah semak Rumah Buda Meriok Nanga Engkilili, Sri Aman, kena Hari Enam.

Pengari Operasyen Opis Bomba enggau Penyelamat Negeri, madahka raban bomba bisi nerima kanggau bekaul enggau pengelenyau siku orang tuai, urung jam 8.42 malam.

Orang tuai ke lenyau nya dikelala ngena Langkau Belun, 85 taun.

Ku iya, asil pansik tumu, orang tuai nya (mansa) diripotka pansut ari rumah urung jam 11 pagi kemari.

"Anak orang tuai nya ngaga ripot polis dulu sebedau nganggauka raban Bomba enggau Penyelamat (BBP) Sri Aman, ngambika ulih nulung ngiga apai iya. 

"Berindik ari ripotka diterima, empat raban bomba enggau ketuai operasyen, Bangga Baie, berumban ngesah ke palan penusah ke nyadi," ku iya lebuh ke dirandau pengarang berita sehari tu. 

Operasyen Ngiga enggau Nyelamat (SAR) dibantu raban polis, raban Bomba Sukarela (PBS) Engkilili, Opis Sukarelawan Malaysia (RELA) enggau peranak menua nya.

Operasyen SAR diketuka urung jam 12 tengah malam tadi enggau belabuh ngiga baru sehari tu.