1 March 2019 - Hari Lima ba Minggu Ketujuh Musim Selama
Cari Berita

Advertisement

1 March 2019 - Hari Lima ba Minggu Ketujuh Musim Selama

Chief Editor | Berita Iban MY
March 1, 2019

“Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.”

Bacha Ke Satu: Sirak 6: 5 - 17

Enti nuan mereti bejaku sereta beradat nuan deka bulih mayuh pangan. 

Bepangan meh enggau semua orang tang semina ningaka penemu siku dua aja ti tau dikarap. 

Enti nuan deka ngiga pangan, anang beguai arap ke sida; uji dulu sida nya sekalika taluk tauka enda. 

Bisi orang deka bepangan enti bisi penguntung, tang lebuh nuan tusah, sida nadai nulung. 

Bisi pangan nyau ngelaban ketegal bisi laya, lalu iya ngemalu nuan nusi laya seduai ngagai semua orang. 

Bisi mega pangan begulai makai enggau nuan, tang iya ngelengkaka nuan maya nuan bisi penusah. 

Lebuh nuan kaya iya ngaga diri baka nuan, lalu ngudar bala kuli nuan. 

Tang lebuh nuan nyau merusut iya mutar ngelaban nuan, lalu iya rari ari nuan.

Nyauhka diri ari munsuh nuan, tang selalu bejaga-jaga ari pangan nuan. 

Pangan ke manah endang baka tempat endur belindung ti selamat. Orang ke tetemuka pangan baka nya endang tetemuka reta ti berega amat. 

Pangan ke manah nadai ulih kira rega iya, lalu nadai ulih giga banding enggau iya. 

Iya nya baka ubat ti ngasuh nuan bepegerai. Orang ke nangika Tuhan deka tetemuka pangan baka nya. 

Orang ke nangika Tuhan ulih nyadi pangan ke manah laban sida manah enggau pangan baka enggau diri empu.

Masmur Entara: Masmur 119: 12, 16, 18, 27, 34, 35

Saut (peda 35a): Iring aku TUHAN, nitihka pesan Nuan.

Ke Satu
Aku muji Nuan, O TUHAN. 
Ajar meh aku jalai Nuan.

Saut: Iring aku TUHAN, nitihka pesan Nuan.

Ke Dua
Aku gaga ati ke adat Nuan. 
Aku deka seruran ingatka pesan Nuan.

SautIring aku TUHAN, nitihka pesan Nuan.

Ke Tiga
Buka meh mata aku, 
ngambika aku ulih meda utai ti badas dalam adat Nuan.

SautIring aku TUHAN, nitihka pesan Nuan.

Ke Empat
Asuh aku meretika adat Nuan, 
lalu aku deka belematika pengawa Nuan ti badas.

SautIring aku TUHAN, nitihka pesan Nuan.

Ke Lima
Asuh aku mereti, 
ngambika aku ngasika adat Nuan 
lalu nitihka iya enggau pengabis ati aku.

SautIring aku TUHAN, nitihka pesan Nuan.

Ke Enam
Iring aku nitihka pesan Nuan, 
laban aku rinduka iya.

SautIring aku TUHAN, nitihka pesan Nuan.Saut: Iring aku TUHAN, nitihka pesan Nuan.

Alleluia / Aklamasi sebedau Injil (peda John 17: 17B, 17A)

Alleluia, alleluia
Jaku Nuan, O TUHAN, nya pemendar;
nguduska kami dalam pemendar.
Alleluia.

Bacha Injil: Mark 10: 1 - 12

Jesus angkat ari endur nya, lalu mupuk ngagai menua Judea, enggau ngagai menua ti ngilah Sungai Jordan. 

Mayuh amat orang datai baru ngagai Iya, lalu endang baka selama, Iya ngajar sida.

Orang Parisi datai deka nguji Iya. 

Ku sida nanya, “Kati laki tau muai bini?”

Iya lalu nyaut sida, “Nama pesan Moses ngagai kita?”

Ku sida, “Moses ngemendarka laki nulis surat sarak, lalu muai bini iya.”

Tang ku Jesus bejaku ngagai sida, “Moses nulis pesan nya ke kita, laban kita kieh.

Tang kenyau ari penumbuh dunya, ‘Allah Taala ngaga mensia lelaki enggau indu.’

Ketegal nya, lelaki deka ninggalka apai indai iya, lalu begulai enggau bini iya, lalu seduai iya deka nyadi setubuh.

Nya alai, seduai iya ukai dua iku agi, tang siku.

Nya alai, nadai orang tau nyeraraka utai ti udah ditampilka Allah Taala.”

Lebuh sida pulai baru ke rumah, sida murid nanya Iya baru pasal pekara nya.

Lalu ku Iya bejaku ngagai sida, “Barang sapa muai bini, lalu jadi enggau indu bukai, butang ngelaban bini iya, lalu enti bini muai laki, lalu jadi enggau lelaki bukai, iya butang.”