10 March 2019 - Hari Minggu Keterubah Musim Lent - Berita Iban Online | Laman Web Berita Kitai

Header Ads

  • Baru Nyadi

    10 March 2019 - Hari Minggu Keterubah Musim Lent

    Jesus penuh laban Roh Kudus pulai ari Jordan, lalu Iya dibai Roh Kudus ngagai menua puang, alai Iya ke diuji Sitan empat puluh hari.

    Bacha Ke Satu: Ulang Adat 26: 4 - 10

    Ku Moses bejaku ngagai orang mayuh: “Lebuh imam nya ngambi bakul nya ari jari kita, lalu ngengkahka bakul nya di mua alta TUHAN Allah Taala kita, kita enda tau enda nyebut leka jaku tu di mua TUHAN Allah Taala kita:
    ‘Aki ini kami orang Aram ti diau segau-segau ba sebelah endur; iya enggau sida sebilik mansang ngagai menua Ejip, lalu diau dia nyadi orang kampar; sida nadai mayuh tubuh, tang sida nyadi bansa ti besai, ti kering sereta mayuh tubuh.

    Lebuh orang Ejip jai enggau kami, lalu mejalka kami nyadi ulun, kami nyabak ngangauka TUHAN Allah Taala aki ini kami; TUHAN ninga kami lalu meda pemedis, penusah enggau pemerinsa kami.

    TUHAN lalu mai kami pansut ari menua Ejip ngena jari Iya ti kering, enggau ngena lengan ti diunjurka Iya, ngena kuasa ti besai ti dipandangka Iya, sereta enggau ngena kereja ajih, enggau kereja ti nyelai; lalu Iya udah mai kami ngagai endur tu, lalu meri menua ti kaya sereta ami tu ngagai kami.

    Nya alai diatu aku mai buah bungas ari utai ti ditanam aku ba tanah ti udah diberi Nuan, O TUHAN, ngagai aku.’

    Kita lalu ngengkahka bakul nya di mua TUHAN Allah Taala nuan, lalu meremi di mua Iya.”

    Masmur Entara: Masmur 91: 1 - 2, 10 - 11, 12 - 13, 14 - 15

    Saut (peda 15b): Lebuh aku kena laban penusah, TUHAN deka bisi enggau aku.

    Ke Satu
    Barang sapa ke datai ngagai TUHAN ngiga pengelikun,
    barang sapa ke dijaga Iya ti Pemadu Bekuasa,
    tau nyebut ngagai Iya, “Nuan endang penyaga enggau pengelindung aku.
    Nuan endang Allah Taala aku.
    Aku manggaika pengarap aku ba Nuan.”

    Saut: Lebuh aku kena laban penusah, TUHAN deka bisi enggau aku.

    Ke Dua
    Nya alai nuan enda ditinggang penusah,
    lalu pengachau pen nadai mega datai semak rumah nuan.
    Allah Taala deka ngasuh bala melikat Iya ngibun nuan
    lalu nyaga nuan di sebarang endur nuan bejalai.

    SautLebuh aku kena laban penusah, TUHAN deka bisi enggau aku.

    Ke Tiga
    Sida deka nyambut nuan ngena jari sida
    ngambika kaki nuan enda terempas ba batu.
    Nuan deka ngelunjak singa enggau ular,
    singa ti mangah enggau ular ti bisa.

    SautLebuh aku kena laban penusah, TUHAN deka bisi enggau aku.

    Ke Empat
    Aku deka ngelepaska orang ke rinduka Aku
    lalu nyaga orang ke ngaku Aku nyadika TUHAN sida.
    Lebuh sida ngangauka Aku, Aku deka nyaut sida.
    Lebuh sida kena laban penusah, Aku deka enggau sida.
     Aku deka ngelepaska sida lalu masa sida.

    SautLebuh aku kena laban penusah, TUHAN deka bisi enggau aku.

    Bacha Ke Dua: Rome 10: 8 - 13

    Menyadi: Utai ti disebut Bup Kudus nya munyi tu: “Jaku nya semak kita, ba mulut kita enggau dalam ati kita.”

    Nya meh pesan pengarap ti dadahka kami, laban enti kita ngaku ngena mulut kita Jesus nya Tuhan, lalu dalam ati kita arapka Allah Taala udah ngangkatka Iya ari mati, kita deka diselamatka.

    Laban kita arap ngena ati kita, lalu digaga lurus, lalu kita ngaku ngena mulut kita, lalu diselamatka.

    Munyi ti disebut Bup Kudus, “Orang ke arapka Iya sigi enda asa ngapa.”

    Laban orang Judah enggau orang bansa bukai sigi nadai bida ari pangan diri; Tuhan siku nya aja ke nyadi Tuhan ke semua mensia, lalu Iya gerah mudah meri berekat ngagai semua orang ke ngangauka Iya.

    Laban, “Genap iku orang ke ngangauka nama Tuhan, deka diselamatka.”

    Aklamasi sebedau Injil (peda Matthew 4: 4B):

    Mensia enda ulih idup makai roti aja,
    tang beridup ba genap leka jaku ti pansut ari mulut Allah Taala.

    Bacha Injil: Luke 4: 1 - 13

    Jesus penuh laban Roh Kudus pulai ari Jordan, lalu Iya dibai Roh Kudus ngagai menua puang, alai Iya ke diuji Sitan empat puluh hari.

    Iya nadai makai utai dalam kandang empat puluh hari nya, lalu ba ujung empat puluh hari nya, Iya lapar.

    Sitan lalu bejaku ngagai Iya, “Enti Nuan amat Anak Allah Taala, asuh batu tu nyadi roti.”

    Disaut Jesus, “Endang udah ditulis, ‘Mensia enda ulih idup makai roti aja.’

    Sitan lalu mai Iya ngagai siti endur ti tinggi, lalu mandangka ngagai Iya dalam sekejap mata semua menua di dunya lalu bejaku ngagai Iya,

    “Aku deka meri semua kuasa enggau semua pengaya nya ngagai Nuan, laban semua utai nya udah diberi ngagai aku, lalu aku deka meri utai nya ngagai sebarang orang ke dipilih  aku.

    Nya alai, enti Nuan deka nyembah aku, semua utai nya deka diempu Nuan magang.”

    Jesus lalu nyaut iya, “Endang udah ditulis, ‘Sembah Tuhan Allah Taala nuan, lalu betuaika Iya siku aja!’”

    Sitan lalu mai Jesus ngagai Jerusalem, lalu ngengkahka Iya ba legit perabung Rumah Sembiang, lalu bejaku ngagai Iya,

    “Enti Nuan amat Anak Allah Taala, terejun Nuan ari tu, laban endang udah ditulis, ‘Allah Taala deka ngasuh melikat Iya nyaga Nuan.’

    Lalu tu mega udah ditulis, ‘Sida deka nyambut Nuan ngena jari sida, ngambika kaki Nuan enda terempas ba batu.’”

    Ku Jesus nyaut iya, “Endang udah disebut, ‘Anang nguji Tuhan Allah Taala nuan,’”

    Lebuh Sitan udah tembu nguji Jesus ngena genap macham chara, iya ninggalka Jesus, nganti maya ti manah.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads