13 March 2019 - Hari Tiga ba Minggu Keterubah Musim Lent
Cari Berita

Advertisement

13 March 2019 - Hari Tiga ba Minggu Keterubah Musim Lent

Chief Editor | Berita Iban MY
March 13, 2019

Lebuh orang nyau majak mayuh-semayuh, Jesus lalu belabuh bejaku, “Orang ke rebak diatu endang amat jai. 

Bacha Ke Satu: Jonah 3: 1 - 10

TUHAN lalu bejaku ngagai Jonah baru.

Ku Iya, “Alai nuan mansang ngagai Nineweh, nengeri ti besai nya, lalu padahka ngagai orang dia pesan ti udah dipadahka Aku ngagai nuan.”

Nya alai Jonah ngasika TUHAN, lalu mansang ngagai nengeri Nineweh.

Nengeri nya besai amat, pejalai tiga hari ari tisi sepiak ngagai tisi sepiak.

Jonah lalu belabuh bejalai nengah nengeri nya, lalu lebuh iya udah bejalai sehari, iya lalu bejaku enggau orang dia madahka pesan TUHAN, “Dalam empat puluh hari da agi nengeri Nineweh deka dirusak!”

Orang Nineweh arapka pesan Allah Taala. Nya alai sida lalu mutuska penemu ngasuh semua orang bepasa, lalu semua orang, berengkah ari orang ke pemadu tinggi pangkat nyentuk ngagai orang ke pemadu baruh pangkat, bela ngerasukka kain guni kena sida nunjukka diri udah nesal ati.

Lebuh raja nengeri Nineweh ninga pasal utai nya, iya lalu angkat ari kerusi diraja iya, muka baju panjai iya, ngerasukka kain guni, lalu duduk malai amau.

Iya ngirumka atur ngagai orang di Nineweh: “Tu atur ari raja, enggau ari bala pemesai iya: Nadai mensia, tauka jelu, tauka raban bedus, tau makai utai.

Sida enda tau makai tauka ngirup.

Semua mensia enggau jelu enda tau enda ngerasukka kain guni.

Semua orang enda tau enda bebendar besampi ngagai Allah Taala, lalu enda tau enda muai ulah ti jai, lalu badu agi mangah enggau orang.

Nyangka ukur Allah Taala deka ngubah runding Diri, lalu badu agi ringat, ngambika kitai enda mati!”

Allah Taala meda utai ti dikereja sida. Iya meda sida udah ngelengkaka ulah sida ke jai. Nya alai Iya ngubah runding Diri, lalu enda nyadi ngukum sida.

Masmur Entara: Masmur 51: 1 - 2, 10 - 11, 16 - 17

Saut (peda 17b): O Allah Taala, Nuan enggai nulak ati ti baruh, ati ti nesal.

Ke Satu
Kasihka aku, O Allah Taala, laban pengerindu Nuan endang meruan.
Laban pengasih Nuan endang besai, buai meh dosa aku!
Buai abis semua penyai aku
lalu tuchi aku ari dosa aku!

SautO Allah Taala, Nuan enggai nulak ati ti baruh, ati ti nesal.

Ke Dua
Gaga ati aku tuchi, O Allah Taala,
lalu simpan roh ti baru sereta taluk, dalam aku.
Anang muai aku ari mua Nuan.
Anang ngambi Roh Kudus Nuan ari aku.

SautO Allah Taala, Nuan enggai nulak ati ti baruh, ati ti nesal.

Ke Tiga
Nuan enda rinduka piring,
nya kebuah aku enda ngenjuk sida ngagai Nuan.
Nuan enda rinduka piring tunu.
Piring aku nya ati ti baruh, O Allah Taala.
Nuan enggai nulak ati ti baruh, ati ti nesal.

SautO Allah Taala, Nuan enggai nulak ati ti baruh, ati ti nesal.

Aklamasi sebedau Injil (peda Joel 2: 12 - 13):

Tang taja pia, ku TUHAN bejaku,
pulai baru meh kita diatu ngagai Aku enggau pengabis ati kita,
laban Aku nelap sereta penuh pengasih.

Bacha Injil: Luke 11: 29 - 32

Lebuh orang nyau majak mayuh-semayuh, Jesus lalu belabuh bejaku, “Orang ke rebak diatu endang amat jai.

Sida minta tanda, tang nadai tanda deka diberi ngagai sida, kelimpah ari tanda Jonah.

Laban baka Jonah ke nyadika tanda ke orang Nineweh, baka nya meh Anak Mensia deka nyadika tanda ke orang ke rebak diatu.

Lebuh Hari Pechara ila, kuin ari menua ti di Selatan deka bediri sama enggau orang ke rebak diatu, lalu besalah sida, laban iya udah datai ari tisi dunya deka mendingka penemu-dalam Solomon.

Tang peda, utai ti besai agi ari Solomon bisi ditu diatu.

Lebuh Hari Pechara ila orang Nineweh deka bediri sama enggau rebak ti diatu, lalu besalah sida, laban orang Nineweh empu udah nesal ati ke dosa sida, lebuh sida mendingka jaku ti dipadahka Jonah.

Tang peda, utai ti besai agi ari Jonah bisi ditu diatu!