Header Ads

  • Baru Nyadi

    14 March 2019 - Hari Empat ba Minggu Keterubah Musim Lent



    Bacha Ke Satu: Ester C: 12, 14 - 16, 23 - 25

    Enggau ati ti tusah udu Kuin Ester malik ngagai Tuhan.

    Iya lalu besembiang ngagai Tuhan Allah Taala Israel, “Tuhan aku, Raja aku, semina Nuan siku aja ti Allah Taala.

    Aku diatu kediri-diri. Aku nadai orang endur bepanggai, semina ba Nuan siku aja. Tulung meh aku! Aku diatu deka berantuka nyawa aku.

    O Tuhan, sepengingat aku, kami sebilik bisi nusi ke aku baka ni Nuan milih Israel ari semua bansa bukai, lalu baka ni dulu menya Nuan milih aki ini kami nyadi nembiak Nuan selama iya.

    Nuan enda kala bula ke semaya enggau sida.

    Ingatka kami O Tuhan. Datai tulung kami ke benung tusah.

    Beri aku pemerani, Raja semua petara ke megai semua kuasa dunya. Berika aku jaku ti patut disebut lebuh aku betemu enggau Serses ti mangah.

    Ubah ati iya ngambika iya ngalih lalu deka ngelaban Haman ti munsuh kami, lalu ngerusak iya enggau bala iya. Datai meh, lalu selamatka kami, O Tuhan.

    Tulung aku; aku kediri-diri, nadai orang endur bepanggai, semina ba Nuan aja.

    Masmur Entara: Masmur 138: 1 - 2AB, 2CDE - 3, 7C - 8

    Saut (peda 3a): Nuan nyaut aku, TUHAN, lebuh aku ngangauka Nuan.

    Ke Satu
    Aku meri terima kasih ngagai Nuan, O TUHAN, enggau pengabis ati aku.
    Aku belagu muji Nuan di mua bala petara.
    Aku meremi ngadap ngagai Rumah Nuan ti kudus,
    lalu meri terima kasih ngagai nama Nuan.

    SautNuan nyaut aku, TUHAN, lebuh aku ngangauka Nuan.

    Ke Dua
    Ketegal pengerindu enggau penetap ati Nuan ti meruan belama iya,
    laban Nuan udah mandangka Diri
    enggau pesan Nuan endang tinggi ari semua.
    Nuan nyaut aku, lebuh aku ngangauka Nuan.
    Ngena pengering Nuan, Nuan ngeringka aku.

    SautNuan nyaut aku, TUHAN, lebuh aku ngangauka Nuan.

    Ke Tiga
    Jari kanan Nuan ngelepaska aku.
    Nuan deka ngamatka semua utai ti udah disemaya Nuan ngagai aku;
    Pengerindu Nuan endang meruan belama iya, O TUHAN.
    Anang ninggalka nembiak Nuan Israel.

    SautNuan nyaut aku, TUHAN, lebuh aku ngangauka Nuan.

    Aklamasi sebedau Injil (peda Masmur 51: 10A, 12A):

    Gaga ati aku tuchi, O Allah Taala,
    pulaika aku baru ngagai pengaga ti datai ari pengelepas Nuan.

    Bacha Injil: Matthew 7: 7 - 12

    Ku Jesus bejaku ngagai murid Iya: “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita.

    Laban genap iku orang ke minta, deka nerima, lalu orang ke ngiga, deka nemu, lalu ke orang ke nekung, utai nya deka dibuka ke sida.

    Kati kita ke apai meri batu ngagai anak kita enti iya minta roti?

    Tauka meri iya ular, enti iya minta ikan?

    Enti kita ke jai nemu meri utai ti manah ngagai anak kita, Apai kita ti di serega tentu nemu agi meri utai ti manah ngagai orang ke minta ari Iya!

    “Kereja ngagai orang baka ke dikedekaka kita kereja orang ngagai kita, laban nya reti Adat, enggau ajar sida nabi.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads