Header Ads

  • Baru Nyadi

    18 March 2019 - Hari Satu ba Minggu Kedua Musim Lent

    “Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun.

    Bacha Ke Satu: Daniel 9: 4B - 10

    “TUHAN Allah Taala, Nuan endang besai, lalu kami nangika Nuan.

    Nuan endang tetap ati ngagai sempekat Nuan, lalu ngayanka pengerindu ti meruan ngagai orang ke rinduka Nuan sereta ngereja utai ti diasuh Nuan.

    Kami udah bedosa, kami udah jai, kami udah ngereja penyalah.

    Kami udah nulak utai ti diasuh Nuan kereja kami, lalu kami udah limpang ari utai ti ngena ti udah diayanka Nuan ngagai kami.

    Kami enda mendingka bala nembiak Nuan, iya nya sida nabi, ke bejaku dalam nama Nuan ngagai bala raja kami, bala orang ke merintah kami, bala aki ini kami, enggau ngagai semua bansa kami.

    Nuan, TUHAN, endang seruran ngereja utai ti ngena, tang kami udah ngemaluka diri empu. Utai tu endang amat ba semua bala kami ke diau di Judea enggau di Jerusalem, enggau ba semua orang Israel ti udah diachirka Nuan ba sebelah menua ti jauh enggau ti semak, ketegal sida udah enda tetap ati ngagai Nuan.

    Bala raja kami, bala orang ke merintah kami, enggau bala aki ini kami udah ngereja utai ti balat ngemaluka kami empu, lalu udah bedosa ngelaban Nuan, O TUHAN.

    Nuan endang penuh laban pengasih enggau pengampun, taja pen kami udah angkat ngelaban Nuan.

    Kami enda mendingka Nuan, O TUHAN Allah Taala kami, lebuh Nuan ngasuh kami nitihka adat ti udah diberi Nuan ngagai kami nengah bala nembiak Nuan, iya nya sida nabi.”

    Masmur Entara: Masmur 79: 8, 9, 11 & 13

    Saut (peda 103: 10A): TUHAN, anang ngukum kami nitihka dosa kami.

    Ke Satu
    Anang ngukum kami ketegal dosa aki ini kami.
    Kasihka kami diatu.
    Kami nadai pengadang agi.

    SautTUHAN, anang ngukum kami nitihka dosa kami.

    Ke Dua
    Tulung kami, O Allah Taala,
    lalu selamatka kami.
    Lepaska kami,
    lalu ampun dosa kami ketegal nama Nuan.

    SautTUHAN, anang ngukum kami nitihka dosa kami.

    Ke Tiga
    Pendingka orang jil bedemuh
    lalu enggau kuasa Nuan ti besai,
    lepaska orang ke diukum bunuh.
    Nya baru kami ke nembiak Nuan,
    ke ari raban bedus Nuan,
    deka meri terima kasih ngagai Nuan belama iya
    lalu muji Nuan belama iya jemah ila.

    SautTUHAN, anang ngukum kami nitihka dosa kami.

    Aklamasi sebedau Injil (peda John 6: 63C, 68C):

    Jaku Nuan TUHAN nya Roh enggau pengidup.
    Nuan ngembuan jaku ti meri pengidup ti meruan belama iya.

    Bacha Injil: Luke 6: 36 - 38

    Ku Jesus bejaku ngagai murid Iya: “Kasihka orang, baka Apai kita ti kasih.

    “Anang ngakim, nya baru kita enda diakim. Anang ngukum, nya baru kita enda diukum. Ampun, nya baru kita diampun.

    Beri, lalu kita deka diberi. Takar ti chukup, ti dienyak, digusak, ti meruap lalu lilih, deka diberi ngagai kita; laban takar ti dikena kita nakar deka dikena nakar utai ke kita.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads