Header Ads

  • Baru Nyadi

    21 March 2019 - Hari Empat ba Minggu Kedua Musim Lent


    Bacha Ke Satu: Jeremiah 17: 5 - 10

    Ku TUHAN bejaku, “Tulah meh orang ke ninggalka Aku lalu manggaika pengarap sida ba mensia, ba pengering mensia.

    Orang nya baka babas di menua puang, ti tumbuh ba tanah ti rangkai sereta kusi, ba tanah ti masin ti nadai tumbuh utai. Nadai utai ti manah bisi kala nyadi ba orang nya.

    “Tang Aku deka merekatka orang ke manggaika pengarap sida ba Aku.

    Orang nya baka kayu ti tumbuh ba tebing sungai lalu nyerangkapka urat iya ngagai sungai. 

    Iya enda takutka musin kemarau, lalu daun iya mengkang gadung. 

    Iya enda irauka hari ti nadai ujan. lalu iya majak bebuah.

    “Sapa nemu ati mensia? Nadai utai ti nemu agi ngakal ari ati mensia. Iya kelalu balat sakit lalu enda ulih digeraika.

    Aku ti TUHAN, meresa runding sereta nguji ati mensia. Aku meri sida utai nitihka jalai sida idup, nitihka utai ti dikereja sida.”

    Masmur Entara: Masmur 1: 1 - 2, 3, 4 & 6

    Saut (peda 40: 4a): Beberekat meh orang ke manggaika pengarap ba TUHAN.

    Ke Satu
    Beberekat meh orang ti enda nitihka penemu orang ke jai, 
    lalu enda nitihka teladan orang ke bedosa 
    ti enda begulai enggau orang ke ngeleseka Allah Taala,
    tang gaga ati ke Adat TUHAN, 
    lalu belematika Adat nya siang malam.

    SautBeberekat meh orang ke manggaika pengarap ba TUHAN.

    Ke Dua
    Orang nya baka kayu ti ditanam ba tebing sungai, 
    ti bebuah ninting musin lalu daun iya nadai kala layu. 
    Iya mujur dalam semua utai ti dikereja iya.

    SautBeberekat meh orang ke manggaika pengarap ba TUHAN.

    Ke Tiga
    Tang orang ke jai enda baka nya. 
    Iya baka rumput ti rangkai ti dikebuka ribut.
    Laban TUHAN deka ngintu orang ke lurus, 
    tang jalai pengidup orang ke jai deka dirusak.

    SautBeberekat meh orang ke manggaika pengarap ba TUHAN.

    Aklamasi sebedau Injil (peda Luke 8: 15):

    Beberekat meh orang ke ninga pesan, 
    lalu ngingatka iya dalam ati ti manah sereta ngasi, 
    lalu sida bebuah enggau ati ti liat sereta tan.

    Bacha Injil: Luke 16: 19 - 31

    Ku Jesus bejaku ngagai orang Parisi:

    “Nyadi dia bisi siku orang kaya. Iya bekenaka pekayan ti berega, lalu diau makai nyamai tiap hari.

    Lalu ba mua pintu orang nya bisi siku orang ke seranta, ke abis dibalut rumbak. Nama iya Lasarus.

    Lasarus bisi amat ati deka makai pemakai ti labuh ari mija orang kaya nya. Indah ukui deh datai lalu nilat rumbak iya.

    Orang ke seranta nya mati, lalu dibai bala melikat ngambika iya diau enggau Abraham. Orang kaya nya mega mati, lalu dikuburka.

    Di dunya pemati, alai iya ke balat kena perinsa, iya engkadah lalu tepedaka ari jauh Abraham duduk ngimbai Lasarus.

    Orang kaya nya lalu ngangau, ‘Apai Abraham! Kasihka aku, lalu asuh Lasarus datai kitu ngambika iya nyepuhka ujung tunjuk iya ngagai ai, lalu ngenyelapka dilah aku, laban aku pedis amat merinsa dalam api tu!’

    Tang ku Abraham bejaku, ‘Ingat, anak, lebuh nuan agi idup, nuan diberi semua utai ti manah, tang Lasarus diberi semua utai ti jai. Tang diatu iya lantang diau ditu, tang nuan pedis merinsa.

    Nambahka nya, ba entara kitai bisi siti darung ti dalam, ngambika orang ke deka meraka ari tu ngagai kita, enda ulih, lalu orang ke deka meraka ari endur kita ngagai kami, pen enda mega ulih.’

    Ku orang kaya nya bejaku, ‘Enti pia, apai, aku minta nuan ngirumka Lasarus ngagai rumah apai aku, laban aku bisi lima iku menyadi lelaki, ngambika iya meri jaku tangkan ngagai sida, enggai ke sida datai ba endur pemerinsa tu.’

    Abraham lalu nyaut, ‘Sida bisi Moses enggau sida nabi. Awakka bala menyadi nuan patut mendingka sida.’

    Ku orang kaya nya bejaku, ‘Ukai baka nya, apai Abraham! Enti siku orang ke angkat ari mati mansang ngagai sida, nya baru sida deka nesal ati ke dosa sida.’

    Tang ku Abraham, ‘Enti sida enggai mendingka Moses enggau sida nabi, sida pen enggai mega arap enti orang siku angkat ari mati.’”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads