Header Ads

  • Baru Nyadi

    25 March 2019 - Hari Satu ba Minggu Ketiga Musim Lent

    Solemnity of the Annunciation of the Lord.

    Bacha Ke Satu: Isaiah 7: 10 - 14; 8: 10

    TUHAN ngirumka siti agi pesan ngagai Ahas:

    “Pinta siti tanda ari TUHAN Allah Taala nuan. Nuan tau minta tanda nya datai ari buntut dunya pemati, tauka ari endur ti tinggi di serega.”

    Disaut Ahas, “Aku enggai minta tanda, laban aku enggai nguji TUHAN.”

    Isaiah lalu nyaut, “Pendingka diatu, kita ke peturun Raja David. Kita udah ngabas pengeliat ati mensia. Kati kita deka mega ngabas pengeliat ati Allah Taala?

    Diatu TUHAN Empu deka meri kita siti tanda: siku indu dara deka ngandung lalu ngadaka anak lelaki siku, lalu iya deka meri anak mit nya nama Imanuel, ti mai reti “Allah Taala enggau kitai”.

    Masmur Entara: Masmur 40: 6 - 7A, 7B - 8, 9, 10

    Saut (peda 7a & 8a): Tu aku, TUHAN; Aku datai ngereja peneka Nuan.

    Ke Satu
    Nuan enda begunaka piring enggau pemeri. 
    Nuan nadai minta jelu ti ditunu segala ba alta 
    tauka minta piring pengampun dosa. 
    Tang Nuan udah meri aku pending kena aku ningaka Nuan
    nya alai aku nyaut, “Tu aku.

    SautTu aku, TUHAN; Aku datai ngereja peneka Nuan.

    Ke Dua
    Atur ti diberi Nuan ngagai aku bisi dalam Bup Adat.
    Naka meh pengerindu ati aku ngereja peneka Nuan, O Allah Taala aku! 
    Aku nyimpan ajar Nuan dalam ati aku.”

    SautTu aku, TUHAN; Aku datai ngereja peneka Nuan.

    Ke Tiga
    Lebuh semua nembiak Nuan begempuru, O TUHAN, 
    aku madahka berita manah pasal Nuan ke ngelepaska kami. 
    Nuan nemu, aku sigi enggai badu nusui berita nya.

    SautTu aku, TUHAN; Aku datai ngereja peneka Nuan.

    Ke Empat
    Aku nadai kala ngelalaika berita pasal pengelepas dalam ati aku. 
    Aku endang seruran bejakuka pasal penetap ati enggau pengelepas Nuan. 
    Lebuh semua nembiak Nuan begempuru, 
    aku nadai kala enda bejakuka pasal penaluk 
    enggau pengerindu Nuan ti meruan belama iya.

    SautTu aku, TUHAN; Aku datai ngereja peneka Nuan.

    Bacha Ke Dua: Hebrew 10: 4 - 10

    Menyadi:

    Laban darah sapi enggau darah kambin enda ulih muai dosa.

    Nya kebuah, lebuh Kristus datai ngagai dunya tu, Iya bejaku, “Nuan enda begunaka piring enggau pemeri, tang Nuan udah nyendiaka tubuh ke Aku.

    Nuan enda rinduka piring tunu enggau piring pengampun dosa.

    Udah nya Aku bejaku, ‘Tu Aku, O Allah Taala sedia deka ngereja peneka Nuan, munyi ti udah ditulis pasal Aku dalam Bup Adat.’ 

    Lebuh Iya nyebut, “Nuan enda beguna tauka rinduka piring enggau pemeri, tauka jelu ti ditunu ba alta, enggau piring pengampun dosa,” (taja pen Adat ngasuh utai nya diberi).

    Iya lalu nyebut, “Tu Aku, sedia deka ngereja peneka Nuan.” Nya alai, Allah Taala muai atur ti keterubah ngambika Iya numbuhka atur ti kedua.

    Lalu ulih peneka Iya, kitai udah dikuduska ulih piring tubuh Jesus Kristus ti diberi sekali aja ke belama-lama iya.

    Aklamasi sebedau Injil (peda John 1: 14):

    Jaku Allah Taala nyadi mensia, lalu diau begulai enggau kitai, lalu kitai udah meda mulia Iya.

    Bacha Injil: Luke 1: 26 - 38

    Dalam bulan ti keenam Elisabet betubuh-bisi, Allah Taala ngasuh melikat Gabriel datai ngagai sebuah nengeri ti dikumbai Nasaret di menua Galili, ngagai siku dara bungas ke betunang enggau lelaki siku ke benama Josep ke ari peturun David. 

    Nama dara bungas nya Maria.

    Melikat nya datai ngagai iya, lalu bejaku, “Tabi ke nuan, ke dikerinduka Allah Taala! Tuhan bisi enggau nuan!”

    Tang Maria beba runding ninga jaku melikat nya, lalu belematika reti jaku tabi nya.

    Lalu ku melikat nya bejaku ngagai iya, “Anang takut, Maria, laban nuan dikerinduka Allah Taala.

    Lalu diatu nuan deka betubuh-bisi, lalu ngadaka anak lelaki siku, lalu nuan deka meri iya nama Jesus.

    Iya deka nyadi orang ke tinggi pangkat, lalu Iya deka dikumbai Anak Allah Taala ti Pemadu Tinggi, lalu Tuhan Allah Taala deka meri Iya kerusi diraja aki Iya David.

    Iya deka merintah peturun Jakop belama iya, lalu Perintah Iya enda nemu abis!”
    Maria lalu bejaku ngagai melikat nya, “Baka ni ku utai tu tau nyadi, laban aku dara bungas?”

    Ku melikat nya bejaku enggau iya, “Roh Kudus deka datai atas nuan, lalu kuasa Allah Taala ti Pemadu Tinggi deka ngayung nuan. 

    Nya alai anak mit ti deka diadakanya kudus. Iya deka dikumbai Anak Allah Taala.

    Lalu diatu petunggal nuan Elisabet benung betubuh-bisi taja pen iya nyau tuai. Tu keenam bulan iya betubuh-bisi, taja pen iya dikumbai mandul.

    Laban nadai utai enda ulih dikereja Allah Taala.”

    Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku nuan.” Melikat nya lalu ninggalka iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads