Header Ads

  • Baru Nyadi

    26 March 2019 - Hari Dua ba Minggu Ketiga Musim Lent

    Matthew 18: 21 - 35


    Bacha Ke Satu: Sembiang Azariah (Bup Nabi Daniel): 11 - 20

    Asariah bediri enda engkebut lalu besembiang enggau nyawa ti inggar benung iya dalam api:

    “Taja pia, ketegal nama Nuan, anang mungkir sempekat Nuan enggau kami, lalu anang ngelengkaka kami selama-lama iya. 

    Anang ngenanka pengasih Nuan ngagai kami. 

    Ingatka semaya Nuan ngagai Abraham, ke dikerinduka Nuan, ngagai Isaac, nembiak Nuan, lalu ngagai Jacob, apai bansa Nuan ti kudus. 

    Nuan udah besemaya deka meri sida peturun mayuh baka bintang di langit tauka baka pemayuh pasir di tebing tasik. 

    Tang diatu, Tuhan, bala kami nyau mimit agi ari bansa bukai; lalu dini-dini endur kami, kami sigi diau dalam pemalu ketegal penyalah kami. 

    Kami diatu nyau nadai raja, nadai nabi lalu nadai tuai. Dia nadai agi Rumah Sembiang endur kami nyuaka piring, jelu ke genselan, pemeri kami tauka menyan ngambika bulih pengasih Nuan. 

    Nya alai, kami datai ngagai Nuan enggau ati ti nesal sereta baruh, minta kasihka Nuan nerima kami pulai, baka kami tu ke bisi genselan tunu diberi ke Nuan, baka kambin enggau chapi enggau beribu-ribu bedus ti gemu. 

    Terima meh ati kami ti nesal nyadika genselan ngagai Nuan seharitu, ngambi kami deka ngasika Nuan enggau pengabis ati kami. 

    Nadai orang ke arapka Nuan kala lebu. Enggau pengabis ati, kami diatu besemaya deka ngasika Nuan, nyembah Nuan, lalu besembiang ngagai Nuan. 

    Mentas meh sereta bepengasih enggau kami, lalu badu agi ngasuh kami malu. 

    O Tuhan, selamatka kami ngena siti ari kereja ajih Nuan awakka nama Nuan dibasa.

    Masmur Entara: Masmur 25: 4 - 5AB, 6 & 7BC, 8 - 9

    Saut (peda 6a): Kingatka pengasih Nuan, O TUHAN.

    Ke Satu
    Ajar aku jalai Nuan, O TUHAN. 
    Awakka aku nemu jalai Nuan.
    Ajar meh aku diau nitihka pemendar Nuan, 
    laban Nuan endang Allah Taala aku, ke ngelepaska aku.

    SautKingatka pengasih Nuan, O TUHAN.

    Ke Dua
    O TUHAN, kingatka penelap enggau pengerindu Nuan 
    ti meruan belama iya, ti udah diayanka Nuan kenyau ari dulu kelia.
    Kingatka aku, O TUHAN, ulih pengerindu Nuan ti meruan belama iya, 
    enggau ulih pemadas Nuan!

    SautKingatka pengasih Nuan, O TUHAN.

    Ke Tiga
    Laban TUHAN endang lurus sereta badas, 
    Iya ngajar orang ke bedosa jalai ti patut ditengah sida.
    Iya nguluka orang ke baruh ati nengah jalai ti ngena 
    lalu ngajar sida peneka Iya.

    SautKingatka pengasih Nuan, O TUHAN.

    Aklamasi sebedau Injil (peda Joel 2: 12 - 13):

    Tang taja pia, ku TUHAN bejaku, 
    pulai baru meh kita diatu ngagai Aku enggau pengabis ati kita, 
    laban Aku nelap sereta penuh pengasih.

    Bacha Injil: Matthew 18: 21 - 35

    Udah nya Peter datai ngagai Iya lalu bejaku, “Tuhan, enti menyadi  aku bedosa ngelaban aku, berapa penyuah aku patut ngampun iya? Tujuh kali?”

    Ku Jesus madah ngagai iya, “Ukai tujuh kali, tang tujuh puluh kali tujuh.

    Nya alai Perintah serega tau dibandingka enggau siku raja ke deka meresa akaun bala orang gaji iya.

    Lebuh iya baru deka belabuh ngereja pengawa nya, siku orang gaji, ke udah nginjau bejuta-juta ringgit, dibai betemu enggau iya.

    Laban orang gaji nya enda tebayarka utang diri, nya alai raja lalu ngasuh iya dijual, sama enggau bini enggau bala anak iya, sereta enggau semua reta tengkira iya, kena mayar utang nya.

    Ulun nya lalu besugang di mua raja, minta kasih ari raja. Ku iya, ‘Aku minta nuan sabar enggau aku. Aku deka mayar semua utang aku!’

    Laban raja nya kasihka ulun iya nya, nya alai iya ngelepaska iya, lalu muai utang iya.

    Tang lebuh ulun nya pansut, iya betemu enggau orang siku ke sama ulun baka iya empu, ke berutang semina mimit aja ba iya. Iya nyekal orang nya, lalu bejaku, ‘Bayar utang nuan!’

    Orang ke dichekal iya lalu besugang, minta kasih ngagai iya, ‘Aku minta nuan sabar enggau aku. Aku deka mayar nuan!’

    Tang iya enda sabar enggau orang nya. Iya lalu nutup orang nya dalam rumah jil, datai ke orang nya udah mayar utang iya.

    Lebuh orang gaji ti bukai meda nya, sida tusah amat ati, lalu madahka semua pekara nya ngagai raja.

    Raja lalu ngangauka ulun iya nya, lalu bejaku ngagai iya, ‘Nuan tu ulun ti jai! Aku udah muai semua utang nuan, laban nuan minta aku muai utang nya.

    Kati nuan enda nemu kasihka orang ke sama ulun baka nuan empu, baka aku ke udah kasihka nuan?’

    Raja balat amat pedis ati, lalu ngasuh ulun nya ditutup dalam rumah jil, datai ke iya udah mayar semua utang iya.

    Baka nya meh Apai Aku ti di serega deka ngereja ngagai genap iku kita, enti kita enda ngampun menyadi kita enggau pengabis ati kita.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads