Header Ads

  • Baru Nyadi

    30 March 2019 - Hari Enam ba Minggu Ketiga Musim Lent

    Luke 18: - 14
    Tang pengumpul chukai nya bediri ari jauh, enda berani engkadah ke langit, tang mandam dada diri, ku iya, ‘Allah Taala, kasihka aku ke bedosa tu!’ - Luke 18: - 14

    Bacha Ke Satu: Hosea 6: 1 - 6

    “Aram kitai pulai baru ngagai TUHAN. Iya udah encharikka kitai, tang Iya deka ngeraika kitai. Iya udah ngemakalka kitai, tang Iya deka malut telih kitai.

    Dalam dua hari Iya deka ngidupka kitai baru; ba hari ti ketiga Iya deka ngangkatka kitai ngambika kitai tau idup di mua Iya.

    Aram kitai majak nguji meretika TUHAN. Iya tetap deka datai ngagai kitai, baka penumbuh mata hari, baka ujan ti labuh ninggang tanah.”

    Tang ku TUHAN bejaku, “Israel enggau Judah, nama utai ti patut dikereja Aku ngagai kita? Pengerindu kita ke Aku jampat lesap baka sebun ambun pagi hari, baka ai ambun ti lesap tumu pagi.

    Nya kebuah Aku udah ngasuh bala nabi Aku betemu enggau kita, mai pesan pasal ukum enggau pengerusak. Utai ti diguna Aku ari kita nya terang sereta nyata:

    Aku begunaka pengerindu ti meruan belama iya, ukai piring. Aku rindu agi ke kita nemu Aku, ari kita ke meri piring tunu ngagai Aku.

    Masmur Entara: Masmur 51: 1 - 2, 16 - 17, 18 - 19AB

    Saut (peda Hosea 6: 6): Aku begunaka pengasih, ukai piring.

    Ke Satu
    Kasihka aku, O Allah Taala, laban pengerindu Nuan endang meruan. 
    Laban pengasih Nuan endang besai, buai meh dosa aku!
    Buai abis semua penyai aku 
    lalu tuchi aku ari dosa aku!

    SautAku begunaka pengasih, ukai piring.

    Ke Dua
    Nuan enda rinduka piring, 
    nya kebuah aku enda ngenjuk sida ngagai Nuan. 
    Nuan enda rinduka piring tunu.
    Piring aku nya ati ti baruh, O Allah Taala. 
    Nuan enggai nulak ati ti baruh, ati ti nesal.

    SautAku begunaka pengasih, ukai piring.

    Ke Tiga
    O Allah Taala, kasihka Sion, lalu tulung iya. 
    Gaga baru meh dinding kuta Jerusalem.
    Nya baru Nuan deka gaga ati ke piring ti menyana 
    enggau piring tunu.

    SautAku begunaka pengasih, ukai piring.

    Aklamasi sebedau Injil (peda Masmur 95: 7C - 8A):

    Sehari tu dingaka utai ti disebut Iya:
    Anang kieh!

    Bacha Injil: Luke 18: 9 - 14

    Jesus mega madahka sempama tu ngagai orang ke ngumbai diri lurus lalu mechat orang bukai.

    “Dua iku orang mansang ngagai Rumah Sembiang deka besampi, siku orang Parisi, lalu siku pengumpul chukai.

    Orang Parisi bediri kediri, lalu besampi munyi tu, ‘Allah Taala, aku meri terima kasih ngagai Nuan, laban aku enda baka orang bukai ke penchuri, ke jai, ke butang, tauka baka pengumpul chukai nyin.

    Aku bepasa dua hari dalam seminggu. Aku meri sepuluh peratus ari semua utai ti ulih aku.’

    Tang pengumpul chukai nya bediri ari jauh, enda berani engkadah ke langit, tang mandam dada diri, ku iya, ‘Allah Taala, kasihka aku ke bedosa tu!’

    Aku madah ngagai kita, lebuh seduai iya pulai ke rumah, ukai orang Parisi nya ke lurus, tang pengumpul chukai nya ke lurus di mua Allah Taala. 

    Laban semua orang ke ngeninggika diri deka dikemaruhka, lalu orang ke ngemaruhka diri deka ditinggika.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads