Header Ads

  • Baru Nyadi

    5 March 2019 - Hari Dua ba Minggu Kelapan Musim Selama

    Peter lalu belabuh bejaku enggau Jesus, “Peda Nuan, kami udah ninggalka semua utai, lalu nitihka Nuan.”

    Bacha Ke Satu: Sirak 35: 1 - 12

    Ngasika Adat sebaka enggau pemanah meri piring ti mayuh, lalu nitihka pengasuh Tuhan sebaka enggau pemanah meri piring pemaik.

    Malas pemanah, sebaka enggau meri piring tepung. Meri sedekah, sebaka enggau meri piring terima kasih.

    Orang ke ngerarika diri ari dosa ngenyenangka ati Tuhan, lalu pengawa nya sebaka enggau meri piring minta ampun ari penyalah.

    Anang mai jari puang ngagai Rumah Sembiang, laban Adat ngasuh kitai mai piring.

    Enti orang enggau ati lurus meri piring, gemu ari piring nya neritik atas alta, lalu bau rengut iya niki ngagai endur Tuhan Ke Pemadu Tinggi.

    Tuhan nerima piring ari orang ke lurus, lalu semampai ingatka nya.
    Bebasaka Tuhan enggau ati nelap, lalu anang rangka meri asil ari ketau ti keterubah.

    Bai meh genap piring enggau mua ti chiru, lalu serahka pemeri sepuluh peratus enggau ati gaga.

    Beri meh ngagai Tuhan ke Pemadu Tinggi pemeri ti setipak enggau pemeri Iya ngagai nuan; beri meh pemeri enggau ati nelap naka ulih nuan.

    Gaga baka nya laban Tuhan meri upah; Iya deka malas pemadas nuan sampai tujuh kali lipat.

    Anang nguji nyuap Tuhan, laban Iya enda nerima nya. Anang bepanggai ba piring ti diberi enggau ati ti enda lurus laban Tuhan nya akim ke enda berat sepiak.

    Masmur Entara: Masmur 50: 5 - 6, 7 - 8, 14 & 23

    Saut (peda 23b): Aku tetap deka ngelepaska semua orang ke ngasika Aku.

    Ke Satu
    “Gempuru ngagai Aku bala nembiak Aku ke tetap ati,
    orang ke udah ngaga sempekat enggau Aku ngena piring.
    Langit madahka Allah Taala endang lurus,
    madahka Iya endang Hakim.”

    SautAku tetap deka ngelepaska semua orang ke ngasika Aku.

    Ke Dua
    “Pendingka Aku, kita ke nembiak Aku. Aku deka bejaku.
    Aku deka besaksi ngelaban kita, Israel.
    Aku tu Allah Taala, ti Allah Taala kita.
    Aku ukai nganu kita ketegal piring kita
    tauka ketegal piring tunu ti selalu dibai kita ngagai Aku.”

    SautAku tetap deka ngelepaska semua orang ke ngasika Aku.

    Ke Tiga
    “Beri sampi terima kasih kita nyadika piring ngagai Allah Taala.
    Lalu beri ngagai Iya ti Pemadu Bekuasa semua utai ti udah disemaya kita.
    Meri terima kasih nya piring ti ngemesaika Aku,
    lalu Aku tetap deka ngelepaska semua orang ke ngasika Aku.”

    SautAku tetap deka ngelepaska semua orang ke ngasika Aku.

    Alleluia / Aklamasi sebedau Injil (peda Matthew 11: 25)

    Alleluia, alleluia
    Pujika Nuan Apai, Tuhan ke bekuasa di serega enggau di dunya,
    laban Nuan udah mandangka misteria Perintah ngagai bala anak mit.
    Alleluia.

    Bacha Injil: Mark 10: 28 - 31

    Peter lalu belabuh bejaku enggau Jesus, “Peda Nuan, kami udah ninggalka semua utai, lalu nitihka Nuan.”

    Ku Jesus bejaku, “Enggau bendar Aku madah ngagai kita, nadai orang ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal Aku, enggau ketegal Berita Manah, enda nerima seratus kali lipat mayuh agi ba maya ti diatu, rumah, menyadi lelaki, enggau menyadi indu, indai, anak, enggau tanah, sereta kena perinsa, lalu dalam dunya ti deka datai, bulih pengidup ti meruan belama iya.
    Tang mayuh orang ke dulu deka nyadi dudi, lalu orang ke dudi deka nyadi dulu.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads