6 March 2019 - Hari Tiga Abus (Ash Wednesday) - Berita Iban Online | Laman Web Berita Kitai

Header Ads

  • Baru Nyadi

    6 March 2019 - Hari Tiga Abus (Ash Wednesday)

    Hari Tiga Abus (Ash Wednesday)

    Bacha Ke Satu: Joel 2: 12 - 18

    ‘‘Tang taja pia,’’ ku TUHAN bejaku, ‘‘pulai baru meh kita diatu ngagai Aku enggau pengabis ati kita, bepasa, nyabak sereta ngulit. Awakka ati kita ke tusah ngayanka kita amat nesal ati. Enda chukup enti kita semina nyarikka gari kita aja.’’

    Pulai meh kita baru ngagai TUHAN Allah Taala kita. Iya nelap sereta penuh pengasih. Iya liat ati lalu ngamatka semaya Iya. Iya endang seruran sedia deka ngampun, lalu enda ngukum.

    Nyangka ukur TUHAN Allah Taala kita deka ngubah runding Iya lalu merekatka kita ngena mayuh utai ti ditanam. Nya baru kita ulih meri Iya gandum enggau wain.

    Sepu terumpit ba Bukit Sion. Asuh orang bepasa, lalu kangauka orang begempuru!

    Gelumuka orang mayuh. Tuchi orang mayuh. Bai sida ke tuai. Gempuruka sida ke agi biak enggau bala anak mit mega. Indah orang ke baru jadi melaki-bini deh enda tau enda ninggalka rumah sida lalu datai.

    Sida imam, ke bekereja ke TUHAN ba entara alta enggau penama ngagai Rumah Sembiang, enda tau enda nyabak lalu besampi: ‘‘Kasihka bala nembiak Nuan, TUHAN. Anang nejuka bansa bukai ngelese sereta mechat kami ngena jaku, ‘Dini alai Allah Taala kita?’”

    Udah nya TUHAN lalu ngayanka Diri angkunka menua Iya. Iya kasihka bala nembiak Iya.

    Masmur Entara: Masmur 51: 1 - 2, 3 - 4AB, 10 - 11, 12 & 15

    Saut (peda 1a): Kasihka kami, O TUHAN, laban kami udah bedosa.

    Ke Satu
    Kasihka aku, O Allah Taala, laban pengerindu Nuan endang meruan.
    Laban pengasih Nuan endang besai, buai meh dosa aku!
    uai abis semua penyai aku
    lalu tuchi aku ari dosa aku!

    Saut: Kasihka kami, O TUHAN, laban kami udah bedosa.

    Ke Dua
    Aku ngelala penyalah diri.
    Aku endang seruran nemu dosa diri.
    Aku udah bedosa ngelaban Nuan, ngelaban Nuan siku aja,
    lalu udah ngereja utai ti dikumbai Nuan jai.

    SautKasihka kami, O TUHAN, laban kami udah bedosa.

    Ke Tiga
    Gaga ati aku tuchi, O Allah Taala,
    lalu simpan roh ti baru sereta taluk, dalam aku.
    Anang muai aku ari mua Nuan.
    Anang ngambi Roh Kudus Nuan ari aku.

    SautKasihka kami, O TUHAN, laban kami udah bedosa.

    Ke Empat
    Pulaika aku baru ngagai pengaga ti datai ari pengelepas Nuan,
    lalu asuh aku rajin ngasika Nuan.
    Tulung aku bejaku, O TUHAN,
    lalu aku deka muji Nuan.

    SautKasihka kami, O TUHAN, laban kami udah bedosa.

    Bacha Ke Dua: 2 Korint 5: 20 - 6: 2

    Menyadi:
    Nya alai, kami nyadika pengari Kristus, laban Allah Taala bejaku ngena kami. Kami bebendar ngarika Kristus ngumbuk kita, mai kita bebaik enggau Allah Taala.

    Ketegal kitai meh Allah Taala udah ngengkahka dosa kitai ba Iya ke enda bedosa, ngambika dalam Iya kitai digaga lurus di mua Allah Taala.

    Nya alai, laban kami sama bekereja enggau Allah Taala,  kami mega bebendar ngumbuk kita, anang masau pengasih Allah Taala.
    Laban Allah Taala bisi nyebut:

    “Ba maya ti patut, Aku udah mendingka nuan, lalu lebuh hari pengelepas Aku udah nyaup nuan.”

    Dinga kita! Tu meh maya ti patut. Tu meh hari pengelepas.

    Aklamasi sebedau Injil (peda Masmur 95: 7C & 8A):

    Sehari tu dingaka utai ti disebut Iya: Anang kieh.

    Bacha Injil: Matthew 6: 1 - 6, 16 - 18

    Ku Jesus bejaku ngagai sida murid Iya: “Anang ngereja pengawa agama di mua orang mayuh, minta diri dipeda sida, laban enti kita ngereja nya, kita nadai bulih upah ari Apai kita ti di serega.

    “Nya alai, lebuh kita meri sedekah ngagai orang ke suntuk, anang mandangka diri ngereja nya baka ti dikereja orang ke pura-pura ngapa dalam balai gempuru tauka ba sebelah jalai raya, minta diri dipuji mensia.

    Enggau bendar Aku madah ngagai kita, sida udah nerima upah sida.

    Tang lebuh kita meri sedekah ngagai orang ke suntuk, anang nejuka jari kiba kita nemu utai ti dikereja jari kanan kita, ngambika pengawa nya dikereja kita belalai, lalu Apai kita ti meda utai ti dikereja kita belalai, deka ngupah kita.

    “Lalu lebuh kita besampi, anang baka orang ke pura-pura ngapa, laban sida rindu bediri lalu besampi dalam balai gempuru, enggau ba sukut jalai raya, minta diri dipeda orang.

    Enggau bendar Aku madah ngagai kita, sida udah nerima upah sida.

    Tang lebuh kita besampi, tama ke bilik, tikupka pintu, lalu besampi ngagai Apai kita ti enda dipeda. Lalu Apai kita ti meda utai ti dikereja kita belalai, deka ngupah kita.

    “Lalu lebuh kita bepasa, anang ngayanka mua ti tusah, baka orang ke pura-pura ngapa,laban sida ngurik mua diri ngambika orang nemu sida bepasa.

    Enggau bendar Aku madah ngagai kita, sida udah nerima upah sida.

    Tang lebuh kita bepasa, empungas mua kita, lalu sugu buk kita, ngambika orang enda nemu kita bepasa, tang semina dipeda Apai kita ti enda dipeda, lalu Apai kita ti meda utai ti dikereja kita belalai, deka ngupah kita.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads