Ketegal enda nyadi meli kerita, siku lelaki ngemba bini ngena kapak, nunu rumah
Cari Berita

Advertisement

Ketegal enda nyadi meli kerita, siku lelaki ngemba bini ngena kapak, nunu rumah

Frankie John™
March 27, 2019

Kapak
Kapak ti dikena saspek bini iya (mansa) ba palan penusah ke nyadi.

LAHAD DATU: Siku lelaki ditangkap polis pengudah ngemba bini iya ngena kapak ketegal enda meli ke iya kerita ti dikedeka iya ba palan penusah ke nyadi di Kampung Sapagaya Hilir, ditu.

Penusah nyadi urung jam 6 lemai, Hari Empat minggu nyin tadi, siku lelaki (saspek), 26 taun nya diripotka nampar bini iya (mansa) enggau ngemba deka nunu rumah ke diuan seduai iya.

Nitihka penerang, saspek ringat pengudah bini iya, 45 taun nya madahka iya enda ulih meli kerita ti dikedaka iya laban enda diberi bank pemendar ngelun tauka minjau duit.

Ketuai Polis Pampang Lahad Datu, Asisten Komisioner Nasri Mansor, madahka mansa ngeripotka penusah ke nyadi , tengah hari kemari (Hari Satu).

Ku iya, pengudah nerima ripot ari mansa, seraban polis berumban ngesah ke palan penusah ke nyadi enggau mujur nangkap saspek ba rumah apai indai saspek.

“Asil pansik tumu, penusah nya nyadi lebuh mansa pulai ngambi anak seduai iya ari sekula. Saspek nanya mansa (bini saspek) ulih ke enda iya meli kerita ti dikedaka saspek.

“Tang taja pia, mansa madahka saspek (laki mansa) enda ulih laban udah lebih ari tatak minjau,” ku iya lebuh ke dirandau pengarang berita, kemari.

Ku Nasri, saspek ringat lalu nampar mua mansa enggau lalu ngambi kapak sebedau ngemba deka netak mansa enggau nunu rumah seduai iya.

“Nangkan ke nya, mansa pengudah nya lalu lari ke rumah apai indai iya ketegal irauka pengelikun diri sebedau ngeripotka penusah ke nyadi ngagai polis.

“Seduai iya nikah kena Februari taun nyin kemari enggau nitihka penerang, saspek sebedau tu kala nyamah mansa tang enda diripotka ngagai polis,” ku iya.

Nasri madahka, polis mega ngerampas kapak ti dikena saspek lebuh penusah ke nyadi enggau asil peresa ai kemi, saspek diripotka positif dadah.

Ku iya, saspek ditan ba Balai Polis Pampang (IPD) Lahad Datu laban kena bejalaika pengawa nasat nitihka Seksyen 323 enggau 506 Kanun Keseksaan.