Ketegal penyayau, siku indu 17 taun sanggup ngutang 'along'
Cari Berita

Advertisement

Ketegal penyayau, siku indu 17 taun sanggup ngutang 'along'

Frankie John™
March 27, 2019

TEPANTUP BA BANDIL: Mansa madahka penusah ke ditapi iya lebuh ke dirandau Azman.

SEMENANJUNG: Ketegal penyayau enggau pengeran ati ke siku lelaki, siku indu ti beumur 17 taun sanggup nginjau duit RM12,000 ba along (Money Lender). 

Persatuan Pengguna Islam Malaysia (PPIM), madahka naka kediatu, indu nya mega orang ti pemadu biak dirikodka Unit Banteras Ceti Haram udah minjau duit ba along.

Nitihka penerang, indu nya udah minjau duit ba tujuh along, semua ke duit dipinjau iya nya diberi iya ngagai siku lelaki (sulu ati) kena mayar bulan motosikal enggau melanja lelaki nya. 

Diatu indu nya, napi penanggul deka mayar utang duit ke dipinjau iya ba along kenyau ari lima bulan tu udah lalu.

Ku indu nya, aku kereja nyadi sapit nyaga kedai ba KL, aku ngelala lelaki nya taun nyin kemari sebedau tua iya nganggam pengerindu (besulu).

Ku iya, pengudah apus sekula pom lima, aku ngelala lelaki nya ti nadai kereja enggau aku suah meri iya duit belanja ketegal sayau ke iya. 

“Pengudah nya, lelaki nya minta ba aku duit mayuh agi laban deka meli (ngelun) sebuah motosikal. Enggau enda berunding panjai, aku mutus ati minjau duit penyampau RM2,000 ba along enggau nulung iya mayar ninting bulan.

“Aku sigi enda berundingka nama penusah ti tau nyadi laban aku sayau amat ke lelaki nya enggau deka begulai sama nyentuk ke jemah ila. Enda lama pengudah nya, aku minjau ba along baru laban gaji aku nyadi penyaga kedai enda entu chukup,” ku iya lebuh ke dirandau Azman Kang, Direktor Unit Banteras Ceti Haram PPIM.

Dalam timpuh beberapa bulan, indu nya agi majak minjau ba tiga iku along penyampau mata duit RM2,000 nyentuk ke RM4,000 enggau semua ungkus ke udah dipinjau iya penyampau RM12,000. 

Pengudah nemu duit ke dipinjau iya nyau majak mayuh tauka munyi ku jaku sempama kitai iban 'tepantup ba bandil', indu nya pan pedis untak berunding bakani chara deka mutarka penanggul utang nya.

“Pengudah aku baum enggau diri sebilik, aku nusika penusah ke ditapi aku ngagai PPIM enggau nguji berandau enggau lelaki nya. Tang lelaki nya baka ke enda ibuhka  ke utai ditanya iya,” ku iya.

Nangkan ke nya, ku Azman, raban PPIM nguji berandau enggau lelaki nya laban deka mutarka penusah tu, tang naka kediatu lalu bedau bisi pemutus tauka asil.

Ku iya, kes tu tusah deka diputarka laban indu nya minjau duit ngena nama iya kediri enggau iya patut megai tanggungpengawa mayar utang nya nitihka surat ti disain sebedau tu.

“Naka kediatu, nitihka ba rikod kes ti bisi kami, indu nya meh orang ti ngutang ba along pemadu biak. Sebedau tu kami bisi nerima ripot ari siku mansa ti beumur 20 taun. Penusah tu nyadi bepun ari umur ti agi biak, sida iya mega agi benung nemu berunding manah ni bagi utai ti patut enggau enda patut digaga.

“Ukai nyamai ngutang enggau mayuh along, tambah mega iya baru apus sekula taun nyin tadi. Tang taja pia, raban kami nguji mantu mutarka kes tu enggau ngaga chara bakani deka mayar semua utang nya nitihka pemutus aum ari along enggau bala ke sebilik enggau indu nya.

“Aku meri jaku ajar ngagai indu nya ngambika iya enda ngereja penyalah ke sama jemah ila enggau anang sesekali pechayaka janji manis orang ti baru dikelala. Raban PPIM mega, suah nerima kes ngelakar ari mansa kebukai pengudah minjau duit ba along enggau sida mega ngemba orang ti minjau duit enggau orang ke sebilik enggau mansa,” ku Azman.