Siku lelaki ditangkap polis, ngayap 12 pelajar indu ba buding pelajar indu di Julau
Cari Berita

Advertisement

Siku lelaki ditangkap polis, ngayap 12 pelajar indu ba buding pelajar indu di Julau

Chief Editor | Berita Iban MY
March 16, 2019

Gambar pengias.

JULAU: Siku nembiak lelaki ditan polis pengudah dipechayaka masung 12 pelajar indu ba buding di sebuah sekula primari, ditu, kena Hari Empat (14 Mac) tu tadi.

Sapit Ketuai Polis Pampang Julau, ASP Colony Kiai, madahka saspek, 17 taun, ex-pelajar sekula nya ditangkap ba sebuah rumah panjai urung jam 3.30 lemai kemari.

“Penusah nya nyadi urung jam 11.15 malam nya, saspek dipechayaka ngayap ke buding pelajar indu lebuh sida iya benung tinduk.

Saspek pemgudah nya dipechayaka murus, nyium enda utai pemalu 12 pelajar indu ti beumur antara sembilan nyentuk 12 taun,” ku iya lebuh ke dirandau pengarang berita, kemari.

Colony madah, saspek dipechayaka tama ke buding pelajar indu nya ngena jalai babas ari tisi sekula nya.

Ku iya, sebedau nya, buding nya sunyi laban ke nang maya tinduk tang pengudah nemu saspek bisi dia, pelajar indu ke diau ba buding nya begau, semua sida iya belanda pansut keluar nuju ke kuarters endur siku Pemantu Penyaga Pengajar (PPM) enggau salah siku ari pelajar nebah lucing sekula.

“Lebuh sekuriti sekula bejalaika pengawa meresa, iya ngeripotka bisi siku lelaki benung gali ba atas tilam buding pelajar indu.

“Lebuh ke ditanya nama kebuah iya tama ke buding nya, saspek enggai nyaut enggau pengudah nya diasuh sekuriti nya pulai ke rumah,” ku iya.

Asil pansik silik, saspek tama ke buding pelajar indu kediri.

Saspek dipechayaka agi sebening pala tauka mabuk pengudah ngirup arak ba di sebuah rumah panjai ke semak endur sekula nya,” ku iya.

Ku iya, polis mega ngerampas tanchut jeans pandak ke dikena saspek lebuh iya tama ke buding pelajar indu nya laban deka nyadika bukti kes nya.

Nangkan ke nya, 12 pelajar ke nyadi mansa lelaki nya dianjung peresa ke Sepital Sarikei.

Naka kediatu, saspek ditan ba lokap polis Julau enggau deka direman sehari tu kena bejalaika pengawa silik agi.

“Kes nya udah tembu enggau ditukuka nitihka genteran "Seksyen 14(a) Akta Kesalahan-Kesalahan Seksual Terhadap Kanak-Kanak 2017",” tandu iya.